Të Premten e Madhe, besimtarët katolikë morën pjesë në Udhën e Kryqit, kremtuar në
Koloseum nga Papa Benedikti XVI. Meditimet e këtij viti u shkruan nga një çift bashkëshortësh
të Lëvizjes së Fokolarëve. Komenti i zëdhënësit të Vatikanit, atë Federiko Lombardi,
përqendrohet pikërisht në kuptimin e këtij gjesti e në impenjimin e Kishës për mbrojtjen
e familjes: “Të falenderojmë o Zot për Udhën e Kryqit. Ndër çastet e kremtimet
e ndryshme të Javës Shenjte, ndoshta ai që prek më shumë zemrën e popullit është Udha
e Kryqit. Nuk duhet të habitemi. Jezusi bëhet i afërt me të gjithë, me gratë e burrat
e çdo kohe, në vuajtjen e tyre, qoftë ajo e pafajshme, apo rrjedhojë e mëkatit. E
vuajtja është pjesë themelore, nganjëherë mbizotëruese, e përvojës së jetës. Mundësia
për ta afruar e për ta bashkuar me atë të Krishtit, është një dhuratë e jashtëzakonshme
për të gjithë, mundësia për ta ndërthurur me misterin e shpresës e të ringjalljes,
është një dhuratë hyjnore për besimtarët. Këtë vit, ideja për t’ua besuar
meditimet e Udhës së Kryqit me Papën në Koloseum, një çifti bashkëshortësh të moshuar
ishte e bukur, gjeniale, e ktheu këtë Udhë në një etapë domethënëse në përgatitjen
e takimit të ardhshëm botëror të familjeve në Milano, në fillim të qershorit. Kisha
impenjohet vazhdimisht për mbrojtjen e familjes, në një kohë kur mendësia aktuale
priret t’ia ulë vlerën e, madje, ta përqeshë besnikërinë e qëndrueshmërinë e saj.
Por duhet ta ndihmojmë, duke i propozuar përshpirtërinë e thellë, që e shoqëron në
vështirësitë, jo vetëm materiale e në sëmundje, por edhe në ato – nganjëherë më të
thella e më të dhimbshme – që kanë të bëjnë me marrëdhëniet ndërmjet bashkëshortëve,
me moskuptimet e me ndarjet ndërmjet prindërve e fëmijëve, deri me vetminë e vejnisë.
Ta ndihmojmë kë ka pasur guximin të formojë familje të vazhdojë të besojë gjithmonë
në forcën e Dashurisë. Prandaj, Udha e Kryqit e familjes, së bashku me Krishtin, drejt
Pashkëve”.