Në audiencën e përgjithshme, Papa kujton shtegtimin në Meksikë e në Kubë dhe e fton
Kishën në misteret e Triditshes së Pashkëve.
Kujtimi i shtegtimit apostolik në Meksikë e Kubë dhe një mendim për Triditshen e Pashkëve,
me të cilën, duke nisur që nesër, Kisha hyn në misterin e vdekjes e të ngjalljes së
Jezusit. Këto ishin dy temat, që përshkuan katekizmin e Benediktit XVI, në audiencën
e sotme të përgjithshme.
Përshkroi shkurtimisht, atë që pa, që jetoi, që ndjeu
gjatë shtegtimit të tij në Meksikë e në Kubë Papa, pesë ditë pas kthimit në Romë,
kur mbresat janë ende të freskëta, duke i lënë Triditshes së Pashkëve, së cilës zakonisht
ia kushton gjithë audiencën e së Mërkurës së Madhe, vetëm minutat e fundit të takimit
javor me besimtarët.
Dy vende, dy kontekste të ndryshme, por një mbresë e përbashkët,
e thellë e paharrueshme: mbresa që i la Papës feja e vërtetë, përzemërsia e ngrohtë,
mikpritja e sinqertë. Duke shkelur në Meksikë e në Kubë, desha, shpjegoi Benedikti
XVI, ta rrok simbolikisht gjithë Kontinentin. E kjo edhe ndodhi. Papa e përqafoi fort
Kontinentin, por edhe Kontinenti i dha një përqafim tejet të ngrohtë, thellësisht
të përzemërt, Benediktit XVI, që nga çasti kur shkeli në Leon të Meksikës: “Në
ato duar të shtrira në shenjë përshëndetjeje e përzemërsie, në ato fytyra të gëzuara,
në ato britma të hareshme, pashë shpresën e pamposhtur të të krishterëve meksikanë,
shpresë, që mbeti e ndezur në zemra, pavarësisht nga çastet e vështira të dhunës,
viktimat e së së cilës i kujtova me gjithë shpirt, edhe duke ngushëlluar personalisht
disa prej tyre”. Por, pavarësisht nga këto plagë e madje, duke u frymëzuar
nga gëzimi i natyrshëm i popullit meksikan, Ati i Shenjtë kujtoi një dhanti tipike
kristiane: “Dishepujt e Zotit duhet të përhapin rreth vetes gëzimin, që buron
nga çdo zemër e krishterë, gëzimin e njeriut, që i përket Kishës. Nga ky gëzim lindin
edhe energjitë për t’i shërbyer Krishtit në çaste të vështira, në dhimbje, në vuajtje.
Ia kujtova këtë të vërtetë turmës vigane, që u mblodh rreth Eukaristisë të së dielës,
në Parkun e Dyqindvjetorit, në Leon. Meksikanët m’u përgjigjen me fe të flaktë e,
në besimin e tyre plot bindje në Ungjill, unë pashë edhe një herë shenjat ngushëlluese
të shpresës për Kontinetin”. Një nga arsyet, që e shtyu Benediktin XVI
të shkonte në Meksikë, ishte ftesa për të kremtuar, në gjirin e meksikanëve, Dyqindvjetorin
e Pavarësisë, festë e përbashkët për mbarë popujt latinoamerikanë. Ndërsa në Kubë,
kremtoi me kubanët një tjetër jubile: 400 vjetorin e gjetjes së shtatores së vogël
të Virgén della Caridad del Cobre, Pajtore e shumëdashur e ishullit. Tek këmbët e
saj, Papa u lut me gjithë zemër për të sotmen e të ardhmen e kubanëve të cilëve -
kujtoi: “U drejtova ftesën ta forcojnë fenë e të kontribuojnë, me guximin
e faljes e të mirëkuptimit, në ndërtimin e një shoqërie të re, me porta të hapura,
në të cilën të ketë gjithnjë vend për Zotin, sepse kur Zoti dëbohet, bota shndërrohet
në një vend të pabanueshëm për njeriun”. E pikërisht ky pohim i fuqishëm
pati jehonë të madhe dhe përgatiti terrenin për etapën e mëpasme, atë të Havanës.
Këtu, përballë autoriteteve të vendit, preku qartë një temë, cekur edhe në Meksikë,
shumë të dashur për Benediktin XVI: atë të mbrojtjes së lirisë fetare, e cila në Kubë
ka bërë hapa të lavdërueshme, por jo përfundimtare, përpara: “Të gjithëve
u kujtova se Kuba dhe Bota kanë nevojë për ndryshime, por këto do të realizohen vetëm
në se do të pranojnë të vërtetën e plotë mbi njeriun, parakusht i domosdoshëm për
sigurimin e lirisë, e në se do të vendosin të mbjellin rreth vetes farën e vëllazërisë,
duke e bazuar gjithë jetën mbi Jezu Krishtin. Pohova edhe se Kisha nuk kërkon privilegje.
Kërkon vetëm të kumtojë e të kremtojë, edhe publikisht, fenë e vet, duke përhapur
në çdo mjedis të shoqërisë, mesazhin e shpresës e të paqes së Ungjillit”. Si
shprehu emocionet, ende të freskëta, të shtegtimit apostolik në udhët e largëta të
Kontinentit amerikanolatin, Papa u kujtoi besimtarëve se nesër nis Triditshja e Pashkëve.
Me ‘Darkën e Mbrame”, pohoi, troket ‘ora e Jezusit’. E gjithë jeta e tij, nënvizoi,
drejtohet kah kjo orë. Një hap buzë humnerës së vdekjes, që pasohet nga hapësira e
re e Ringjalljes: “Jezusi i kapërcen kufijtë e gjendjes njerëzore, shënuar
nga mëkati, shemb murin, që e mban njeriun të burgosur, të ndarë nga Zoti e nga jeta
e pasosur. Zoti na deshi të gjithëve, deri në fund të fundit, deri në dhurimin e plotë
të vetvetes mbi kryq, kur bota u trand nga britma: “Gjithçka u krye”. Lëreni Krishtin
të na prekë me dashurinë e Tij, lëreni të na shndërrojë, lëreni të na dhurojë ringjalljen
e vërtetë!”.