Святы Пасад прыняў удзел у сустрэчы “Сяброў Сірыі”
У Стамбуле завяршылася
сустрэча краін-удзельніц так званай групы “Сябры Сірыі”, у якой прынялі ўдзел прадстаўнікі
больш чым 60 дзяржаў і 10 міжнародных арганізацый. Апостальскую Сталіцу на сустрэчы
прадстаўляў арцыбіскуп Майкл Фіцжэральд. Ён адзначыў, што ад моманту першай сустрэчы
групы, якая адбылася ў Тунісе, сітуацыя ў Сірыі наўрад ці палепшылася. Наадварот,
адбылася эскалацыя насілля і неапраўданага прымянення сілы. Іерарх нагадаў, што Бэнэдыкт
XVI, яшчэ 12 лютага, задоўга да сустрэчы ў Тунісе, заклікаў “пакласці канец усім актам
насілля і кровапраліцця”. Арцыбіскуп падкрэсліў, што насілле спараджае далейшае насілле,
таму ніколі не позна адмовіцца ад яго.
“Апостальская Сталіца выказвае сваю
салідарнасць з ахвярамі, - сказаў арцыбіскуп Фіцжэральд. - Папа Бэнэдыкт XVI заявіў,
што ён узгадвае ахвяраў у сваёй малітве, і не толькі тых, хто аддаў сваё жыццё, у
тым ліку дзяцей, але і “параненых і ўсіх тых, хто пакутуе ад наступстваў ўсё больш
трывожнага канфлікту”. Іерарх заўважыў патрэбу гуманітарнай дапамогі і паведаміў,
што Святы Пасад таксама ўдзельнічае ў ёй.
Арцыбіскуп падкрэсліў, што міратворчая
місія міжнародных арганізацый можа грунтавацца на доўгай гісторыі мірнага суіснавання
паміж рознымі рэлігійнымі і этнічнымі супольнасцямі Сірыі і зацытаваў словы Бэнэдыкта
XVI, звернутыя да сірыйцаў “ісці па шляху дыялогу, прымірэння і адданасці справе міру”.