Бэнэдыкт ХVI: радасць – цэнтральны элемент хрысціянскага досведу
На заканчэнне ўрачыстай
літургіі Пальмовай нядзелі, якую Бэнэдыкт ХVI узначаліў на плошчы св. Пятра ў Ватыкане,
Пантыфік звярнуўся да вернікаў са сваімі разважаннямі перад малітвай “Анёл Панскі”.
“На заканчэнне гэтай ўрачыстасці, - сказаў Папа, - жадаю скіраваць сардэчныя словы
прывітання ўсім прысутным: кардыналам, біскупам, святарам, законнікам і законніцам,
а таксама ўсім вернікам. Спецыяльныя словы прывітання кірую да аргкамітэта апошніх
Сусветных дзён моладзі, якія прайшлі ў Мадрыдзе, і арганізатараў наступнай сустрэчы
ў Рыа дэ Жанейра. Таксама вітаю дэлегатаў міжнароднай сустрэчы на тэму Сусветных дзён
моладзі, якую арганізавала Папская рада па справах свецкіх. Вітаю прысутнага сярод
нас старшыню Рады, кардынала Станіслава Рылку і яе сакратара арцыбіскупа Ёзэфа Клеменса”,
- сказаў Святы Айцец.
Звяртаючыся да польскіх пілігрымаў на іх роднай мове
Папа нагадаў аб значэнні Дыяцэзіяльнага дня моладзі, які праходзіць штогод ва ўсім
свеце ў Пальмовую нядзелю: “Дэвізам сённяшняга Дня моладзі з’яўляюцца словы св. апостала
Паўла: “Заўсёды радуйцеся ў Пану” (Філ 4, 4), - адзначыў Бэнэдыкт ХVI. - Радасць,
якая звязана са свядомасцю таго, што Пан нас любіць, з’яўляецца цэнтральным элементам
хрысціянскага досведу. У свеце, які часта адзначаецца смуткам і няпэўнасцю, яна з’яўляецца
важным сведчаннем прыгажосці і надзейнасці веры. Будзьце радаснымі сведкамі Хрыста!
Няхай благаславіць вас Пан”, - сказаў Пантыфік.
Звяртаючыся на партугальскай
мове, Пантыфік прывітаў арцыбіскупа Рыа дэ Жанейра Орані Хоао Тэмпесту, улады Рыа
на чале з губернатарам і прэфектам і аргкамітэт Сусветных дзён моладзі 2013 г. Святы
Айцец заклікаў іх, каб, рыхтуючыся да гэтай падзеі, мелі на ўвазе дэвіз: “Заўсёды
радуйцеся ў Пану”. Дзякуючы гэтаму дух радасці і гасціннасці, уласцівы бразільцам
стане радасцю, якая нараджаецца ў лучнасці з Хрыстом, Адзіным Збаўцам. “І тады вы
зможаце прыняць з распрасцёртымі рукамі – як статуя Хрыста, што ўзвышаецца над горадам
– моладзь з усяго свету, якая прыбудзе ў ваш горад”, - сказаў Папа.
На заканчэнне
набажэнства Святы Айцец пажалаў усім плённага Вялікага тыдня і Вялікадня.