Թուրք Ուսանողները Կոչ Կ՛ընեն Առերեսուելու Հայոց Ցեղասպանութեան Հետ:
Պոլսոյ յայտնի "Պողազիչի Համալսարան"ի ուսանողները «Խաղաղութեան եւ Արդարութեան շաբաթ»ի
ծիրէն ներս, «Մարդկութիւնը կեղտոտ պատերազմի լաբիրինթոսներէն հանելու համար», կազմակերպած
են ձեռնարկ մը, ուր խօսուած է նաեւ Հայոց Ցեղասպանութեան մասին: Ըստ Պոլսոյ «Ակօս»շաբաթաթերթին՝
Հայոց Ցեղասպանութեան կողքին քննուած են նաեւ քրտական հարցը եւ քանի մը ամիս առաջ Իրաք-Թուրքիա
սահմանին վրայ տեղի ունեցած 35 քիւրտ քաղաքացիներու սպաննութիւնը: Միջոցառման բացման
խօսքին մէջ, Օզկէ Քելեքչին խօսած է ՝՝քիւրտերու ազատութեան ձգտումին, հայերու պատմական
եւ իրաւական արդարութեան փնտռտուքներուն, ինչպէս նաեւ ալաուիներու եւ ասորիներու գոյութեան
պայքարին մասին՝՝: