“Падворак язычнікаў” у Палерма: на фоне прыгажосці бачна ўсё, што крыўдзіць чалавека
У італьянскім Палерма
праходзіць чарговы этап ініцыятывы “Падворак язычнікаў”. Веруючыя і няверуючыя з розных
краін свету сустрэліся на Сіцыліі, каб размаўляць аб “Культуры законнасці ў шматрэлігійным
грамадстве”. Каталіцкі Касцёл на працягу апошняга часу праводзіць сустрэчы накшталт
дыскусій, якія вяліся ў старажытнасці з язычнікамі пры Ерузалімскай святыні. Мэта
“Падворку язычнікаў” – праз дыялог знайсці агульныя для веруючых і няверуючых каштоўнасці
і прынцыпы і скіраваць іх для дабра чалавецтва. Старшыня Папскай рады па культуры
кардынал Джанфранко Равазі, адкрываючы форум, назваў Палерма, які атаясамліваецца
з цэнтрам мафіі, месцам рэальнай барацьбы з беззаконнем і такімі з’явамі, як карупцыя,
насілле і міжнародная арганізаваная злачыннасць.
Кардынал Равазі адзначыў,
што ўдзел у супрацьзаконнай дзейнасці “скажае твар чалавека, створанага на вобраз
і падабенства Бога, падвяргае насіллю права і мараль, фальсіфікуе праўду. Паводле
іерарха, неабходна такім чынам весці міжкультурны і міжрэлігійны дыялог, каб ён скіроўваў
грамадства на аднаўленне братэрскай лучнасці. “Гэта можна асягнуць сілай прыгажосці,
на фоне якой больш яскрава праступае ўсё дрэннае, што крыўдзіць чалавека”,- адзначыў
кардынал Джанфранко Равазі.