Papa në Meksikë e në Kubë: vlerësimi i atë Lombardit
Mediat ndërkombëtare vazhdojnë akoma të komentojnë udhëtimin e Papës në Meksikë e
në Kubë. Vizitë historike, e kanë quajtur analistët, por ndokush edhe ka kritikuar
mungesën e ndonjë takimi. Mbi domethënien e këtij udhëtimi të 23-të apostolik ndërkombëtar
të papnisë së Benediktit XVI, të dëgjojmë drejtorin tonë të përgjithshëm, zëdhënësin
e Vatikanit, atë Federiko Lombardi: “Takim personal e i drejtpërdrejtë ndërmjet
Papës dhe popujve të Meksikës e të Kubës, idealisht, takim me të gjithë popujt hispanjollë
të Amerikës Latine. Ky është pa dyshim, një nga kuptimet më të rëndësishme të vizitës,
që sapo përfundoi. Në sytë e qindra miliona katolikëve të kontinentit amerikan qe
një hap vendimtar – përveç pjesëmarrjes në Asamblenë e Aparesidës më 2007 – për t’i
përforcuar në fe e në një farë kuptimi, për të barazpeshuar vëmendjen për ta, gjatë
kësaj papnie. Një mesazh i qartë inkurajimi për Kishën e të dyja
vendeve, një kërkesë e hapur për ta rritur praninë e Kishës e lirinë fetare, jo si
mbrojtje të privilegjeve, por si mundësi shërbimi e kontributi të frytshëm për të
mirën e të gjithëve, me qëllim ndërtimin e një shoqërie më vëllazërore, më të drejtë,
më të pajtuar e paqësore. Papa është bariu i Kishës Katolike e përmes saj e sidomos,
përmes gjallërisë së saj, kalon shërbimi i tij i fesë e ndikimi në jetën e popujve.
Jo më kot, thelbin shpirtëror të udhëtimit e kuptuam, duke e parë Papën Benedikti
XVI si shtegtar para Virgen de la Caridad del Cobre. Do të ketë
gjithmonë nga ata, që do të vazhdojnë të thonë se duheshin bërë edhe disa takime të
tjera si: vizita në Guadalupe, takimi me disidentët kubanë, me viktimat e pedofilisë
së atë Maciel… Papa nuk mund të bëjë gjithnjë, gjithçka do të dëshironte, brenda kohës
së shkurtër të një udhëtimi, por ata që e dëgjojnë, e kuptojnë frymën dhe synimet
e tij, ata që e ndjekin, e njohin koherencën dhe guximin e mesazheve të tij. Takimi
i vërtetë, ai më i madhi, që përfshin idealisht të gjitha takimet e veçanta, u mbajt,
qe i thellë, spontan, i sinqertë. Qe ai shërbim për më shumë besim e shpresë, që Papa
dëshironte të ofronte”.