Пытанне свабоды – лейтматыў падарожжа Святога Айца на Кубу
Італьянская каталіцкая
газета “Avvenire” аналізуе ў сённяшнім выпуску пілігрымку Бэнэдыкта ХVI на Кубу. Аўтар
артыкула Луіджы Джэнінаццы адзначае, што лейтматывам апостальскага падарожжа Пантыфіка
было пытанне свабоды ў гэтай краіне. “Папа не благаславіў рэжым братоў Кастра, але
выказаў падтрымку тым, хто пажадаў стаць скарэй у аблічы смерці і быць спаленым у
полымі агню, чым здрадзіць свайму сумленню і веры”, - піша журналіст. Ён адзначае,
што Святы Айцец заўсёды стаіць па баку такіх людзей. Луіджы Джэнінаццы падкрэслівае,
што СМІ пільна сачылі за пілігрымкай Папы на Кубу адной з самых складаных падчас цяперашняга
пантыфікату. Яна была звязана з пастаяннай пагрозай палітычных маніпуляцый. “Дыпламатычная
ветлівасць, поціскі рук і сардэчныя сустрэчы з уладамі краіны, а таксама з гістарычнай
постацю – былым прэзідэнтам Фідэлем – у апошнім бастыёне камунізму на Захадзе, не
павінны стаць прычынай, каб не заўважыць таго, што істотнае, менавіта паслання надзеі
Папы, які заявіў аб сабе з пакорай, як пілігрым міласэрнасці”, - адзначае “Avvenire”.
На
яго думку папскае пасланне на Кубе мела драматычны характар, таму што свабода заўсёды
з’яўляецца паняццем драматычным. У сувязі з гэтым, аўтар артыкула цытуе заклік Бэнэдыкта
ХVI да ўсеагульнага доступу да асноўных свабод. Джэнінаццы звяртае ўвагу на тое, што
пакідаючы Кубу, Святы Айцец заклікаў да павагі і клопату пра свабоду, да якой імкнецца
сэрца кожнага чалавека. “Свабода была лейтматывам гэтага незвычайнага апостальскага
падарожжа Папы”, - падкрэслівае журналіст.