Бэнэдыкт XVI падчас св. Імшы ў Гаване казаў аб праўдзе і свабодзе
28 сакавіка Бэнэдыкт
XVI узначаліў св. Імшу, якая прайшла на плошчы Рэвалюцыі ў Гаване. Гэта месца з’яўляецца
адным з сімвалам Кубы і можа змясціць каля 600 тыс. чалавек. Раніцай, каля 8.30 па
кубінскім часе Пантыфік прыбыў на плошчу, а затым разам з шматлікімі іерархамі і ў
прысутнасці вялікай колькасці вернікаў цэлебраваў св. Імшу. У сваёй гаміліі Папа адзначыў,
што толькі пошук праўды можа зрабіць чалавека свабодным, бо ў ёй знаходзім фундаменты
этыкі з якой могуць лічыцца ўсе, а таксама ясныя і канкрэтныя фармуліроўкі аб жыцці
і смерці, абавязках і правах, шлюбе, сям’і і грамадстве, непарушнасці годнасці чалавека.
“Гэта этычная спадчына – можа зблізіць розныя культуры, народы, рэлігіі, улады і грамадзян,
а таксама грамадзян паміж сабой, веруючых у Хрыста з тымі хто не верыць у Яго”, -
сказаў Святы Айцец. “Дарагія браты і сёстры! – прывітаў прысутных Папа - “ Благаслаўлёны
Ты Пане Божа... Благаслаўлёна Тваё хвалебнае і святое імя” (Дан 3, 52). Гэты гімн
благаслаўлення з Кнігі прарока Даніэля гучыць сёння падчас нашай літургіі запрашаючы
заўсёды благаслаўляць і праслаўляць Бога. Мы з’яўляемся часткай народа, які няспынна
святкуе Пана. Аб’яднаемся ў гэтым учынку ласкі, і узнясём наш радасны і даверлівы
голас, які спрабуе злучыць у любові і праўдзе шлях веры. “Няхай будзе благаслаўлёны
Пан” які нас сабраў на гэтай сімвалічнай плошчы, каб мы глыбока паразважалі над сваім
жыццём. Я адчуваю вялікую радасць ад быцця сярод вас і магчымасці ўзначаліць гэту
св. Імшу ў сэрцы юбілейнага года прысвечанага Маці Божай Міласэрнасці Эль Кобрэ.
Сардэчна
вітаю кардынала Хаэмэ Артэгу, арцыбіскупа Гаваны і дзякую за цёплыя словы прывітання,
якія ён скіраваў да мяне ад імя ўсіх. Вітаю таксама шаноўных кардыналаў, маіх братоў
біскупаў Кубы і іншых краін, якія удзельнічаюць у гэтай урачыстай цэлебрацыі. Вітаю
ўсіх прысутных святароў, семінарыстаў, законнікаў і вернікаў, а таксама прадстаўнікоў
уладаў, які тут ёсць разам з намі.
У першым чытанні, якое прагучала, тры маладых
чалавека, пераследаваныя вавілонскім валадаром, аддалі перавагу таму, каб памерці
ў полыме, перад тым, каб здрадзіць свайму сумленню і веры. Яны знайшлі сілу “хваліць,
праслаўляць і благаслаўляць Бога” з упэўненасцю, што Бог Сусвету і гісторыі не дазволіць
ім памерці. Сапраўды, Бог не пакідае ніколі сваіх сыноў і не забывае аб іх ніколі.
Ён стаіць па-над намі і здольны збавіць нас сваёй сілай. У той жа час, Ён блізка да
свайго народа, і праз свайго Сына Езуса Хрыста захацеў пасяліцца паміж намі.
“Калі
вы будзеце трываць у слове Маім, то сапраўды будзеце вучнямі Маімі і пазнаеце праўду,
а праўда вызваліць вас” (Ян 8,31). У фрагменце Евангелля, які быў прачытаны, Езус
адкрыўся як Сын Бога Айца, Збаўца, адзіны, хто можа паказаць праўду і даць сапраўдную
свабоду. Яго навучанне правакавала супраціў і няўрымлівасць яго суразмоўцаў. Ён іх
абвінаваціў ў тым, што яны шукалі яго смерці, маючы на ўвазе найвышэйшую ахвяру прынесеную
на крыжы, якая набліжалася. Але ў той жа момант Ён заклікаў верыць, заставацца ў Яго
слове, каб ведаць праўду, якая адкупляе і ўзнагароджвае.
Сапраўды, праўда –
гэта гарачае жаданне кожнага чалавека. Пошук яе – гэта заўсёды практыкаванне ў сапраўднай
свабодзе. Многія, аднак, аддаюць перавагу ярлыкам і адмаўляюцца ад задання пошуку
праўды. Некаторыя, як Понцій Пілат, іранізуюць над магчымасцю пазнаць праўду (пар.
Ян 18,38), абвяшчаючы няздольнасць чалавека дасягнуць яе і адмаўляючы існаванне праўды
для ўсіх. Такая пазіцыя, як і ў выпадку са скептыцызмам і релятывізмам, спрыяе перамене
ў сэрцы, робячы яго халодным, далёкім ад іншых і закрытым у сабе. Людзі, якія мыюць
рукі, як рымскі правіцель і дазваляюць бегчы рацэ гісторыі не перашкаджаючы ёй.
З
іншага боку, ёсць тыя, хто кепска разумее гэты пошук праўды, зводзячы яго да нерацыянальнасці
і фанатызма. Так яны закрываюцца ў “сваёй праўдзе” і спрабуюць пераканаць у ёй іншых.
Яны, як тыя прыхільнікі закона, якія, калі ўбачылі акрываўленага і параненага Хрыста,
крычалі: “Укрыжуй!” (пар. Ян 19,6). У рэальнасці, той, хто дзейнічае нерацыянальна
не можа стаць вучнем Хрыста. Вера і розум неабходны і абавязковы пры пошуку праўды.
Бог стварыў чалавека даўшы яму пакліканне імкнуцца да праўды і для гэтага надзяліў
яго розумам. Канешне, не ірацыянальнасць, але жаданне праўды, спрыяе хрысціянскай
веры. Кожны чалавек павінен імкнуцца да праўды і бараніць яе калі знойдзе, часам нават
рызыкуючы вялікімі ахвярамі.
Праўда аб чалавеку, гэта неабходная ўмова для
дасягнення свабоды, бо ў ёй знаходзім фундаменты этыкі з якой могуць лічыцца ўсе,
а таксама ясныя і канкрэтныя фармуліроўкі аб жыцці і смерці, абавязках і правах, шлюбе,
сям’і і грамадстве, непарушнасці годнасці чалавека. Гэта этычная спадчына – можа зблізіць
розныя культуры, народы, рэлігіі, улады і грамадзян, а таксама грамадзян паміж сабой,
веруючых у Хрыста з тымі хто не верыць у Яго.
Хрысціянства, узвышаючы каштоўнасці,
якія ляжаць у аснове этыкі, не перашкаджае, але неааварот, агучвае заклік Хрыста пазнаць
праўду, якая зробіць свабоднымі. Вернікі пакліканы звяртацца да сваіх сучаснікаў,
як гэта рабіў Пан, нават перад цёмным прадчуваннем адварочвання і крыжа. Асабістая
сустрэча з Тым, хто з’яўляецца праўдай, натхняе дзяліцца гэтым дарам з іншымі, асабліва
праз сведчанне.
Дарагія сябры, не бойцеся ісці за Хрыстом. У Ім можна знайсці
праўду аб Богу і чалавеку. Ён дапамагае перамагчы наш эгаізм, выйсці за рамкі нашых
амбіцый і ўзвысіцца нат тым, што нас прыціскае. Той, хто чыніць зло і грэх з’яўляецца
рабом граху і ніколі не дасягне свабоды (пар. Ян 8,34). Толькі адмовіўшыся ад нянавісці,
цвёрдага і сляпога сэрца, станем свабоднымі і новае жыццё пачнецца ў нас.
Толькі
з моцнай упэўненасцю ў тым, што Хрыстус з’яўляецца сапраўдным вымярэннем чалавека,
і ведаючы, што ў Ім знаходзіцца неабходная моц, каб вытрымаць любое выпрабаванне,
я хачу адкрыта абвясціць, што Пан Езус – гэта Дарога, Праўда і Жыццё. У Ім можна знайсці
поўню свабоды, святло для глыбокага разумення рэальнасці і магчымасць змяніць яе абнаўляючай
моцай любові.
Касцёл жыве для таго, каб зрабіць іншых удзельнікамі таго, чым
з’яўляецца, а менавіта самаго Хрыста, надзеі і радасці (пар. Клс 1,27). Для таго,
каб выканаць гэта заданне, для Касцёла павінна існаваць рэлігійная свабода, якая заключаецца
ў тым, каб мець магчымасць для публічнага абвяшчэння і святкавання веры, нясучы пасланне
любові, прымірэнння і згоды, якія Езус прынёс свету. Варта з радасцю прызнаць, што
на Кубе былі зроблены крокі, для таго, каб Касцёл мог выконваць гэту сваю місію і
публічна і адкрыта абвяшчаць сваю веру. Аднак, неабходна працягваць. Таму, я хачу
заклікаць кіруючыя ўлады краіны ўмацаваць тое, што было дасягнута і працягваць гэты
шлях служэння супольнаму дабру і усяму кубінскаму грамадству.
Права на свабоду
веравызнання, як ў індывідуальным, так і ў камунітарным вымярэнні, паказвае адзінства
чалавека, які адначасова з’яўляецца грамадзянінам і вернікам. Законна тое, што таксама
і вернікі павінны рабіць уклад у будаванне грамадства. Яе ўмацаванне спрыяе мірнаму
суіснаванню, надзеі на лепшую будучыню, стварае добрыя ўмовы для супакою і гарманічнага
развіцця. Адначасова, устанаўлівае моцны фундамент, які будзе гарантаваць правы будучых
пакаленняў.
Калі Касцёл узвышае права на свабоду веравызнання, ён не патрабуе
якіх-небудзь прывілегій. Касцёл хоча быць верным заданню атрыманаму ад свайго Боскага
заснавальніка, свядомы таго, што дзе прысутнічае Хрыстус, чалавек узрастае ў чалавечнасці
і знаходзіць сэнс свайго існавання. Таму, Касцёл спрабуе даць сведчанне гэтаму ў сваім
прапаведванні і навучанні, у катэхезе, а таксама ў выхаваўчых і універсітэцкіх асяродках.
Неабходна спадзявацца, што хутка наступіць той момант, калі Касцёл зможа знайсці ў
розных сферах ведаў, плёны місіі якую Пан яму даверыў і ніколі не можа пазбавіць.
Цудоўным
прыкладам гэтай працы можа быць кс. Фелікс Варэла, выхаваўца і настаўнік, выдатны
сын горада Гаваны, які застаўся ў гісторыі Кубы першым, хто пачаў навучаць думаць
свой народ. Кс. Варэла паказаў шлях для сапраўдных грамадскіх перамен: выхоўваць цнатлівых
людзей, каб краіна стала годнай і свабоднай, бо гэта перамена залежыць ад духоўнага
жыцця чалавека; сапраўды, “няма айчыны без цнотаў”. Куба і свет маюць патрэбу ў пераменах
але яны наступяць толькі ў набліжэнні да праўды і калі будзе прынята рашэнне стаць
на шлях любові, сеючы прымірэнне і братэрства.
Просячы матчынага заступніцтва
Найсвяцейшай Панны Марыі, памолімся, каб кожны раз калі ўдзельнічаем у Эўхарыстыі
мы станавіліся сведкамі любові, якая адказвае на зло дабром (пар. Рым 12,21), даючы
іншым сябе як жывую гостыю. Будзем ісці ў святле Хрыста, які можа асвяціць цемру памылак.
Памолімся да Яго, з гарачынёю святых, дадзім яму свабодны, шчыры адказ, без страха
і крыўдаў.