Është shtatorja e dytë në botë për nga madhësia, pas asaj, që njihet me emrin Krishti
i Korkovados, në Rio-De-Zhanéjro, si dhe një nga monumentet më të mëdha fetare të
Meksikës, cak shtegtimesh me kalë (Cavalcada), që organizohen çdo vit në Solemnitetin
e Epifanisë. Shtatorja lartohet në majën e Cerro Cubilete, më e larta në zonë (2.700m),
e zgjedhur sepse ndodhet në qendrën gjeografike të Meksikës. Skulptura (80 tonelata,
22 metra gjatësi) e paraqet Krishtin me krahë hapur, me dy engjuj, në të dy krahët:
njëri mban në dorë një kurorë mbretërish; tjetri, një kurorë ferrash. Çuditërisht,
shtatorja nuk drejtohet kah kryeqyteti i Shtetit Guanajuato ose kah kryeqyteti federal,
Qyteti i Meksikos, por kah qyteti León, sepse ishte kjo dioqezë, që konsiderohet si
zemra fetare e vendit, që e financoi projektin fillestar. Shtatorja origjinale,
realizuar më 1923, u shkatërrua më 1926 nga një bombardim, me urdhër të presidentit
të asokohshëm meksikan, Plutarko Elias Calles, në fillim të revoltës së Cristeros
(1926-1929). Skulptura e sotme, përuruar më 1940, u bashkëfinancua nga qeveria meksikane,
si gjest i vullnetit të mirë për bashkëpunim me Kishën.