Нунцый: канкардат з Чарнагорыяй амаль гатовы да падпісання
Перамовы па падпісанні
канкардата паміж Святым Пасадам і Чарнагорыяй набліжаюцца да завяршэння. Чакаецца,
што ў маі або чэрвені 2012 г. Прэзідэнт краіны Філіп Вуянавіч падчас паездкі ў Ватыкан
падпіша дакумент, заявіў Апостальскі нунцый у Чарнагорыі арцыбіскуп Алесандра Дэррыко.
У мінулыя дні яшчэ былі ўнесены невялікія змены ў дакумент на просьбу прэм’ер-міністра
Ігара Лукшыча. Канкардат заменіць папярэднюю дамову, якая была падпісана ў 1886 г.
з тагачасным Княствам Чарнагорыя. Трэба адзначыць, што з большасцю іншых посткамуністычных
краін Цэнтральнай, Усходняй і Паўднёва-Усходняй Еўропы Святы Пасад пачынаючы з 1990
г. заключыў ужо пагадненні. З Рэспублікай Беларусь падобны дакумент на дадзены момант
не падпісаны. Над ім вядуцца працы.
У Чарнагорыі пражываюць 22 тыс. католікаў.
Большасць жыхароў краіны –праваслаўныя. Каталіцкі Касцёл складаецца з двух дыяцэзій:
архідыяцэзіі Бар і дыяцэзіі Котор. У першай, палова католікаў – албанцы. Другая частка
вернікаў архідыяцэзіі Бар як і амаль усе католікі дыяцэзіі Котор – харваты, якія размаўляюць
на харвацка-чарнагорскай мове. Цікава, што Котор належыць да Спліт-Макарскай мітраполіі,
а мясцовы біскуп з’яўляецца членам Канферэнцыі Біскупаў Харватыі.
Урад Чарнагорыі
плануе таксама падпісанне пагаднення з двума Праваслаўнымі Цэрквамі ў краіне, да якіх
належыць каля 72% насельніцтва. Нажаль, дзве канкуруючыя паміж сабой Цэрквы не прызнаюць
легітымнасці адна адной.