29 і 30 сакавіка ў
Палерма пройдзе чарговы этап ініцыятывы Папскай рады па культуры “Падворак язычнікаў”.
Сіцылійскі горад стане наступным пасля Балоніі, Парыжу, Бухарэсту, Фларэнцыі, Рыму
і Ціраны месцам, дзе веруючыя і няверуючыя разам будуць разважаць на тэму “Прававая
культура і шматрэлігійнае грамадства”. Палерма выбраны невыпадкова – традыцыі міжкультурнага
і міжрэлігійнага дыялогу налічваюць тут стагоддзі. Сіцылія з’яўляецца калыскай мафіі,
але таксама і сімвалам барацьбы з ёй. Менавіта тут у 2000 г. была падпісана Канвенцыя
ААН супраць транснацыянальнай арганізаванай злачыннасці. Як адзначыў у інтэрв’ю нашаму
радыё кардынал Джанфранко Равазі, старшыня Папскай рады па культуры, “правядзенне
“Падворка язычнікаў” на Сіцыліі дэманструе жаданне публічна абвясціць аб удзеле Касцёла
ў барацьбе супраць беззаконня і любога парушэння права”.
Рэлігійныя дзеячы,
правазнаўцы, філосафы, гісторыкі, інтэлектуалісты правядуць дыскусіі па такіх пытаннях,
як: “Божае права і чалавечая справядлівасць”, “Рэлігія і правы чалавека”, “Плюралізм
і ўніверсалізм”, “Рэлігіі ў грамадскай прасторы”.