Kardinali Bertone mbi vizitën e Papës në Meksikë: do të çojë një mesazh dashurie e
optimizmi.
Papa Benedikti XVI i kalon ditët që e ndajnë nga nisja e udhëtimit të tij të 23-të
së pari në Meksikë e pastaj në Kubë, në lutje të përditshme, duke rishikuar fjalimet
dhe me një dashuri të madhe për Zojën e Bekuar të Guadalupes. Për këtë arsye, aktivitetet
javore të Papës Ratcinger – duke përfshirë edhe audiencën e përgjithshme të nesërme
– janë anuluar. Njoftimin mbi këto të dhëna të hollësishme për ndjenjat e veçanta
të Papës në pragun e nisjes së tij për Meksikë e dha sekretari i Shtetit të Vatikanit,
kardinali Tarçizio Bertone, në një intervistë për Televisa meksikane: “Zgjedhja
e Meksikës, pa dyshim, është një akt i dashurisë së madhe që Papa ka për Meksikën,
për këtë Vend të madh të Amerikës Latine, për këtë Vend të madh katolik, për këtë
Vend që në njërën anë po zhvillohet shpejtësi të madhe e, në anën tjetër po kalon
edhe përmes problemeve e sfidave të jashtëzakonshme, siç është sfida e dhunës, e korrupsionit,
e trafikut të drogës, sfida këto që kërkojnë impenjimin e të gjithëve, impenjimin
e të gjitha institucioneve fetare, civile, shoqërore për të tejkaluar këtë fazë e
për të rindërtuar themelet e Meksikës mbi vlera të krishtera, që janë në gjakun e
popullit meksikan: vlerat e bashkëjetesës paqësore, të vëllazërimit, të solidaritetit
e të ndershmërisë. Prandaj Papa sjell një mesazh inkurajimi në këtë drejtim e këtë
mesazh ua sjell sidomos të rinjve në mënyrë që të mos demoralizohen, të e humbasin
guximin e shpresën, të mos bien pre e synimeve dhe fitimeve të lehta, por të impenjohen
në ndërtimin e një shoqërie solidare, të një shoqërie të ndershme ku çdonjëri e ka
vendin e vet dhe mund t’i gëzojë të drejtat themelore personale. Pra, ai i Papës është
një mesazh dashurie e inkurajimi të madh e mund të them edhe i një optimizmi”. Meksika
e Selia e Shenjtë kanë kremtuar tashmë njëzetvjetorin e vendosjes së marrëdhënieve
diplomatike. Si i shikoni ju marrëdhëniet ndërmjet dy Shteteve si dhe marrëdhënien
ndërmjet Shtetit e Kishës? “Marrëdhëniet ndërmjet Shtetit e Kishës në Meksikë
janë zhvilluar e rritur, pas dyshim, në mënyrë pozitive: nëse kujtojmë, në shekullin
e kaluar, kishte edhe tensione....Megjithëse populli, e ndjente Kishën si “të veten”,
Kisha konsiderohej si shpirti i popullit, mirëpo nga pikëpamja politike, civile e
strukturore kishte kundërshtime, ekzistonte një tension. Para njëzet vjetësh janë
vendosur marrëdhëniet diplomatike: kjo është shenjë e rëndësishme publike për Kishën
si e tillë. Është një njohje e funksionit universal që është zhvilluar nga Kisha e
nga Selia e Shenjtë. E këtu duhet kujtuar edhe zhvillimin që Meksika pati në bashkësinë
ndërkombëtare, mund të themi mes “Erërave” . Është domethënëse prandaj që këto marrëdhëniet
janë konsoliduar e të frytshme.