Ngushëllimi i Benediktit XVI për vdekjen e Shenudës III, plot mirënjohje për shërbimin
e tij në favor të bashkimit të të krishterëve.
Papa shpreh ngushëllimet tij më të ndjera për vdekjen e Patrikut të koptëve, Shenuda
III i Aleksandrisë, që ndërroi jetë të shtunën e kaluar, në moshën 88 vjeçare, pas
një sëmundjeje të gjatë. Në një mesazh ngushëllimi, Benedikti XVI kujton me mirënjohje
impenjimin e jashtëzakonshëm të Shenudës III për bashkimin e të krishterëve. Posaçërisht
ndalohet tek vizita e paharrueshme në Romë, më 1973, kur, me Palin VI, nënshkruan
një Deklaratë të përbashkët për Mishërimin e Birit të Zotit, e edhe tek takimi i Kairos,
me Gjon Palin II, në vitin jubilar 2000. Benedikti XVI i siguron besimtarët koptë
se lutet për shpirtin e Patrikut të ndjerë dhe u shpreh afërsinë e mbarë Kishës katolike,
me dhimbjen e vëllait për vëllain. I kërkuam Ipeshkvit ndihmës të Patriarkanës
së koptëve të Aleksandrisë, imzot Boutros Fahim, një kujtim për figurën e ndritur
e Shenudës III:
Përgjigje: - Lajmi u përhap si flakë kashte,
sepse egjiptianët e donin shumë, si të krishterët, ashtu edhe myslimanët, e posaçërisht,
ortodoksët, besimtarët e tij, I priu Kishës për shumë e shumë vjet, gati 40 në krye
të Patriarkanës. La një gjurmë të pashlyeshme. Kur e pati marrë detyrën e lartë, Kisha
ishte tejet e ligshtë, shumë e fshehur... Kisha ortodokse, e kryesuar prej tij, përparoi
shumë në nivel baritor. Krijoi një numër të madh famullish e dioqezash jashtë Egjiptit,
pothuajse në të gjitha vendet e botës. I dha një gjalllëri të paparë jetës kishtare
në mbarë Egjiptin, e nuk e kam fjalën vetëm për koptët ortodoksë. La një shenjë të
madhe, të pashlyeshme në Kishë, në këtë periudhë, e tani, duke u nisur kah një botë
më e mirë, lë këtu, poshtë, një zbraztësirë të madhe.