Պենետիկտոս ԺԶ Սրբազան Քահանայապետին Գործունէութիւնը։

Ուրբաթ 16 Մարտի առաւօտեան ժամը 9ին Պենետիկտոս ԺԶ Սրբազան Քահանայապետը Վատիկանի Redemptoris Mater մատրան մէջ մասնակցեցաւ քառասնորդաց շրջանի աւանդական ՜՜Պահոց քարոզներու՝՝ նիստին, զոր կատարեց Քահանայապետական տան քարոզիչը՝ հայր Րանիէրօ Քանդալամէսսան։
Այսօրուայ խորհրդածութեան գլխաւոր նիւթն էր <<Սուրբ Աթանասը եւ Քրիստոսի Աստուածութիւնը>>։
Ժամը 11ին Պենետիկտոս ԺԶ Սրբազան Քահանայապետը իր գրասենակի մէջ ընդունեց Ընտանիքներու Քահանայապետական Խորհուրդի Նախագահը՝ Կարտինալ Էննիօ Թոնելլին, ապա Կիեւի (Ուկրանիա) Աւագ Արքեպիսկոպոսը՝ Գերերջանիկ Զվիաթոզլաւ Շէվջուք։
Ապա ժամը 11.40-ին Նորին Սրբութիւնը ունկնդրութիւն շնորհեց Միացեալ Նահանգներու Կաթողիկէ եպիսկոպոսաց համահաւաք դասի կարգ մը եպիսկոպոսներուն, եկած՝ իրենց հնգամեայ կանոնական այցելութիւնը կատարելու Սուրբ Պետրոսի յաջորդին։
Հուսկ ժամը 12.15 անց Սրբազան Հայրը` հրաժեշտի այցի առթիւ ընդունեց Փորթուկալի Դեսպանը՝ Տիար Մանուէլ Թոմաս ֆէրնանտէս Բերեյրան։
Ուրբաթ 16 Մարտի յետ միջօրէին ( ժամը 18ին) Նորին Սրբութիւնը հանդիպում ունեցաւ Հաւատոյ Ժողովի կառավարիչ Կարտինալ Ուիլլիամ Ժոզէֆ Լեվատայի հետ։