Shtegtimi i Papës në Meksikë e në Kubë një udhëtim për të zgjuar shpresën
Nga 23, deri më 29 mars, Papa do të jetë në Meksikë e në Kubë. Sot paradite, kjo vizitë
apostolike u paraqit në Sallën vatikanase të Shtypit.Bari e shtegtar. Kështu
do të jetë së shpejti Papa, në udhëtim drejt Meksikës e Kubës. E sot paradite ne Vatikan,
vizita papnore u paraqit në aspektet e saj të ndryshme, në takimin e drejtorit të
Sallës vatikanase të Shtypit, atë Federiko Lombardi, me gazetarët.
Është
shtegtimi i 23-të apostolik ky, që do të nisë së shpejti Ati i Shenjtë drejt Meksikës
e Kubës. Të ndryshme, arsyet e dy etapave: kryesisht, përkujtimi i 200-vjetorit të
pavarësisë së Meksikës dhe i 400-vjetorit të gjetjes së figures të Zojës, nën emërtimin
Virgen de la Caridad del Cobre, Pajtore e Kubës. Në të dy vendet është ende i gjallë
kujtimi i vizitave të Gjon Palit II: pesë, në Meksikë, dhe një e gjashtë, simbolike,
që përfundoi më 31 dhjetorin e kaluar, gjatë të cilit reliket e të Lumit Karol Vojtila
shtegtuan në të 91 dioqezat; ndërsa më 1998, Papa polak pati shtegtuar në ishullin
karaibik. Të ndryshme, edhe çastet e kësaj vizite, që do të fillojë më 23, për
të përfunduar me 29 mars. Benedikti XVI do të vizitojë qytetet meksikane Leon dhe
Guanajuato, qendër gjeografike e trojeve meksikane, që shkelet për herë të parë prej
një pape. Pikërisht në Leon, të dielën, më 25 mars, do të kremtohet Mesha Shenjte
në parkun e Dyqindvjetorit të Pavarësisë, hapësirë e gjerë, kushtuar luftës kombëtare
meksikane. Ndërsa etapat kubane do të jenë Santiago e Havana, me vizitën në Shenjtëroren
e Zojës së Kobres, Nënës së dashurisë së krishterë, figure e Marisë, rreth së cilës
prej dy shekujsh mblidhet me devocion të thellë mbarë populli kuban. Në këtë shtegtim
Papa dëshiron të përqafojë gjithë Amerikën. E, simbolikisht, edhe do ta përqafojë:
në takimet e ndryshme, do të jenë të pranishëm ipeshkvijtë e të gjitha vendeve të
Kontinentit. Në të dy shtetet, Ati i Shenjtë do të takohet me autoritetet më të larta
civile e fetare. Duke iu përgjigjur njërës nga pyetjet e gazetarëve mbi një takim
të mundshëm me Fidel Kastron, liderin e vjetër kuban, i cili prej ndonjë viti ia
lëshoi presidencën të vëllait, Raul, atë Lombardi sqaroi se është një hamendje jashtë
programit, por që nuk mund të përjashtohet. Drejtori i Sallës vatikanase të Shtypit
ripohoi edhe qëndrimin e Selisë së Shenjtë lidhur me embargon amerikane, ende në fuqi
kundër Kubës:
“Selia e Shenjtë mendon se embargoja ka si pasojë vuajtjet
e popullit e, prej këndej, nuk e arrin qëllimin për të krijuar kushte më të mira jetese,
prandaj Selia e Shenjtë nuk e shikon si masë pozitive, të nevojshme”.Si në
Meksikë, ashtu edhe në Kubë, po jetohet me entuziazëm në rritje, atmosfera e pritjes
së Papës, parë si çast shumë i rëndësishëm për t’i përforcuar në fe të dyja vendet
me traditë të thellë të krishterë, në dritën e misionit kontinental, nisur nga vetë
Benedikti XVI më 2007-ën në Aparesida të Brazilit, me rastin e Konferencës së Ipeshkvijve
të Amerikës Latine.