Kongregata për Doktrinën e Fesë ka një faqe të re interneti
Doctrinafidei.va është faqja e re e internetit e Kongregatës për Doktrinën e Fesë,
e cila synon të lehtësojë konsultimin e dokumenteve, që i përkasin këtij dikasteri.
Lajmi u dha sot nga Salla e Shtypit e Vatikanit, duke saktësuar se dokumentet do të
vazhdojnë të ruhen në faqen zyrtare të Selisë së Shenjtë, siç është bërë deri tani. “Siç
dihet – shpjegon nota – dokumentet e Kongregatës për Doktrinën e Fesë, miratuar nga
Ati i Shenjtë, bëjnë pjesë në Magjisterin e zakonshëm të Pasardhësit të Shën Pjetrit.
Kjo shpjegon rëndësinë e kuptimit të qartë të tyre nga ana e besimtarëve, por sidomos
nga ata, që në emër të Kishës, impenjohen në studimet teologjike e baritore. Nga ana
tjetër, në botën e sotme, është e nevojshme përhapja më e madhe e mësimeve të Dikasterit”. Në
faqen e re të internetit pasqyrohen të gjitha dokumentet e Kongregatës pas Koncilit
II të Vatikanit. Më kryesorët janë përkthyer në tetë gjuhë: latinisht, frëngjisht,
anglisht, italisht, portugalisht, spanjisht, gjermanisht e në polonisht. Nganjëherë
gjenden edhe variantet në hungarisht, sllovakisht, çekisht e hollandisht. Dokumentet
ndahen në tri lista tematike: ato me natyrë doktrinore, ato me natyrë disiplinore
dhe ato, që kanë të bëjnë me sakramentet. Gjithashtu, në Doctrinafidei.va publikohet
kolana “Dokumente e Studime”, me interpretimet e teologëve më të njohur; jepen lajme
mbi Simpoziumet e Kongregatës dhe botohen fjalimet e kardinajve prefektë.