പാപ്പായുടെ
മെക്സിക്കോ സന്ദര്‍ശനം
14 മാര്‍ച്ച് 2012, റോം
ബനഡിക്ട് 16-ാമന്‍ പാപ്പായുടെ മെക്സിക്കോ സന്ദര്‍ശനം ലാറ്റിനമേരിക്കന്‍ ജനതയുടെ മതാനുഷ്ഠാന സംസ്ക്കാരത്തെ ആഴപ്പെടുത്തുമെന്ന് റോമിലെ മെക്സിക്കന്‍ കോളെജിന്‍റെ
റെക്ടര്‍ ഫാദര്‍ അര്‍മാന്തോ നവാരോ അഭിപ്രായപ്പെട്ടു.
മാര്‍പാപ്പയുടെ ആസന്നമാകുന്ന മെക്സിക്കോ-ക്യൂബാ സന്ദര്‍ശനത്തോടനുബന്ധിച്ച് വാര്‍ത്താ ഏജന്‍സികള്‍ക്കു നല്കിയ അഭിമുഖത്തിലാണ് ഫാദര്‍ നവാരോ ഇപ്രകാരം പ്രസ്താവിച്ചത്.
മാര്‍ച്ച് 23-മുതല്‍ 28-വരെ തിയതികളിലാണ് മാര്‍പാപ്പ മെക്സിക്കോ-ക്യൂബാ ലാറ്റിനമേരിക്കന്‍ രാജ്യങ്ങള്‍ സന്ദര്‍ശിക്കുന്നത്.
മെക്സിക്കോയുടെ ഭൂമിശാസ്ത്ര കേന്ദ്രമായ സിലാവോ മലിയിലെ ക്രിസ്തു ശില്പത്തിന്‍റെ താഴ്വാരത്ത് മാര്‍ച്ച് 25-ന് രാവിലെ മാര്‍പാപ്പ ജനങ്ങള്‍ക്കൊപ്പം അര്‍പ്പിക്കുന്ന ദിവ്യബലിയും വചനപ്രഘോഷണവുമാണ് മെക്സിക്കോ സന്ദര്‍ശനത്തിലെ ശ്രദ്ധേയമാകുന്ന സംഭവം. അതില്‍ 10-ലക്ഷത്തിലേറെ ജനങ്ങള്‍ പങ്കെടുക്കുമെന്നാണ് സംഘാടകരുടെ കണക്കുകൂട്ടലെന്ന് ഫാദര്‍ നവാരോ അറിയിച്ചു. പരമ്പരാഗതമായ മതാചാരങ്ങളില്‍ ജീവിക്കുന്ന മെക്സിക്കന്‍ ജനതയുടെ വിശ്വാസത്തെ ആഴപ്പെടുത്തുവാനും ബലപ്പെടുത്തുവാനും പാപ്പായുടെ സന്ദര്‍ശനവും സാന്നിദ്ധ്യവും സഹായകമാകുമെന്ന് മെക്സിക്കോയിലെ സിലാവോ പട്ടണവാസിയായ ഫാദര്‍ നവാരോ അഭിമുഖത്തില്‍ പങ്കുവച്ചു.
| All the contents on this site are copyrighted ©. |