Ватыканскі іерарх упэўнены, што ў Італіі не адбудзецца легалізацыі аднаполых саюзаў
Арцыбіскуп Рыно Фізікелла,
старшыня Папскай рады па новай евангелізацыі, упэўнены, што ў Італіі не адбудзецца
легалізацыі саюзаў паміж прадстаўнікамі аднаго полу. На яго думку італьянцы знойдуць
“іншыя формы”, якія не будуць супярэчыць “артыкулу Канстытуцыі, у якім гаворыцца аб
сям’і”. Іерарх лічыць, што з цягам часу грамадзяне будуць лепш разбірацца ў сферы
правоў чалавека і формах сумеснага жыцця. “Я лічу, што зараз перад Італьянскім парламентам
стаяць больш тэрміновыя і істотныя для жыцця краіны пытанні”, - сказаў арцыбіскуп
Фізікелла, паведамляе інфармацыйнае агенцтва “KAI”. Ён адзначыў, што не сумняваецца
ў тым, што мудрасць, традыцыі і культура італьянскага народа дазволяць разабрацца
ў гэтым пытанні ў згодзе з акрэсленым у Канстытуцыі разуменнем сям’і. Акрамя таго,
арцыбіскуп Фізікелла крытычна выказаўся ў адрас былога прэм'ер-міністра Вялікабрытаніі
Тоні Блэра, які падтрымаў ініцыятыву легалізацыі аднаполых саюзаў. “Ён павінен зрабіць
рахунак сумлення і зразумець, у чым заключаецца сувязь паміж верай і канкрэтнымі ўчынкамі
палітыка”, - сказаў іерарх. Нагадаем, што у 2007 г. Тоні Блэр перайшоў з англіканства
ў каталіцтва.