Mbushet sot një vit nga tërmeti, që goditi Japoninë pikërisht më 11 mars, duke shkaktuar
probleme të tilla me reaktorin bërthamor të Fukushimës, sa ta bënte krejt botën të
dridhej nga frika e një shpërthimi bërthamor, me pasoja të pallogaritshme. Në shumë
vende ndryshoi politika energjitike, duke përjashtuar prodhimin e energjisë nga centralet
bërthamore. Zëdhënësi i Selisë së Shenjtë, atë Federiko Lombardi komenton sot
pikërisht këtë ngjarje:
“Tërmeti
i fuqishëm, që goditi Japoninë, më 11 mars të vitit të kaluar, mbetet i ngulitur jo
vetëm në kujtesën e popullit të Lindjes së Largët, por edhe të botës mbarë, ashtu
si tsunami akoma më i frikshëm i dhjetorit 2004, në Oqeanin Indian, me qindra mijëra
viktimat e tij. Tërmeti dhe tsunami japonez shkaktuan 20 mijë të vdekur, duke zënë
mat një vend, që bashkëjeton prej shekujsh me këto katastrofa, pa mundur gjithsesi,
të parashikojë këtë të fundit. Fatkeqësi, që vazhdoi me aksidentin impresionues të
centralit bërthamor të Fukushimës, me pasoja më pak të dukshme e më afatgjata. Besimi
në shkencën, planet e emergjencës, krejt politika energjitike e një vendi të përparuar
e të organizuar u vunë seriozisht në dyshim. Sot, në Japoni, funksionojnë vetëm katër
reaktorë bërthamorë, ndërsa 50 të tjerët janë ndalur. Studiuesit mendojnë se lëkundjet
e vitit të kaluar kanë krijuar një gjendje jo të qëndrueshme, që e bën edhe më të
madh probabilitetin për një tërmet tjetër. Jeta, perspektivat, kanë ndryshuar. Të
gjithë e admiruam mënyrën e guximshme, plot dinjitet e solidaritet, me të cilën populli
japonez reagoi para tragjedisë dhe u organizua për të mbartur mbi vete pasojat. Në
ditën e së Premtes së Madhe, duke iu përgjigjur pyetjes së një vogëlusheje japoneze,
në një emision televiziv, Papa i thoshte: “Edhe unë e pyes veten pse ndodhi kjo. Nuk
mund të përgjigjemi, por dimë se Jezusi vuajti për ne, megjithëse i pafajshëm. Zoti
më do, është me mua, një ditë do ta kuptoj se kjo vuajtje nuk është e kotë. Të jesh
e sigurtë se ne jemi me ty, me të gjithë fëmijët japonezë, që vuajnë. Lutemi së bashku,
që për ju, të arrijë sa më shpejt drita”. Para një tragjedie më të madhe
nga sa mund të mbajmë mbi supe, nuk duhet humbur shpresa e duhet gjetur kuptimi më
i thellë e më i qëndrueshëm i fatit tonë të përbashkët, i udhës sonë mbi tokë”.