Ati i Shenjtë pret primatin anglikan, Rouan Uiljams. Pasdite, Mbrëmësoret ekumenike
Dita e djeshme, për Papën Benedikti XVI, pati një frymëmarrje të spikatur ekumenike.
Paradite Papa priti në audiencë private kryeipeshkvin e Kanterburit, Rouan Uiljams,
primat i Bashkimit anglikan, ndërsa pasdite, duke nisur nga ora 17.30, kryesoi Lutjet
ekumenike Mbrëmësore në Bazilikën romake të Shën Gregorit në Çelio, me pjesëmarrjen
e primatit anglikan. Në sfond të këtij takimi, përkujtimi i njëmijëvjetorit të themelimit
të Eremitazhit të Kamaldolit, vlerën e posaçme të të cilit na e shpjegon rektori
i Bazilikës së Shën Gregorit, atë Inoçenco Gargano:
Përgjigje:
Shën Gregori në Çelio u është besuar nga Gregori XIII vetmitarëve të Kamaldolit,
në vitin 1573. Kur erdhën këtu, manastiri, i themeluar nga Gregori i Madh në vitin
573, kishte njëmijë vjet histori.Tani lind vetvetiu pyetja: pse Papa u takua
pikërisht këtu me kryeipeshkvin e Kanteburit, primat i Bashkimit anglikan? Duhet kujtuar
se pikërisht nga ky manastir i Romës, Shën Gregori i Madh, në vitin 597, nisi 40 murgjër
për të ungjillëzuar anglezët. Prandaj anglezët, duke filluar nga ky vit, u bënë të
krishterë katolikë. Duhet shtuar, pastaj, se murgjërit e dërguar në Britani, shtuan
radhët e kështu, nga manastiret angleze, dhjetra vetmitarë u nisën për të ungjillëzuar
Holandën, Gjermaninë, Zvicrën e Austrinë, deri në lumin Elbë. Prej këndej mund të
themi se, falë mendjemprehtësisë së Shën Gregorit të Madh, ungjillëzuan mbarë Evropën
qëndrore. Duhet kujtuar edhe se Vetmitorja e Kamaldolit, e themeluar nga Shën Romualdi,
mori gjithnjë frymë me dy mushkëri; një raveneze, domethënë e traditës bizantine,
e një romake, domethënë e traditës latine. Veprimtaria e murgjërve u shtri deri në
Bukuresht e martirët kamaldolezë dhanë dëshminë për Krishtin, duke u martirizuar në
trojet e Polonisë, të Ukrainës, të Suedisë e të gadishullit skandinav.