Кс. Ламбардзі нагадвае аб гадавіне землятруса ў Японіі
Дырэктар Ватыканскага
радыё і Кіраўнік Залі Друку Апостальскай Сталіцы італьянскі іезуіт кс. Фэдэрыко Ламбардзі
нагадаў аб моцным землятрусе, які год таму абрынуўся на Японію і выклікаў вялікія
чалавечыя ахвяры. “Моцны землятрус, які ўдарыў па Японіі 11 сакавіка мінулага года
застанецца ў памяці не толькі народа краіны Узыходзячага Сонца, але ўсяго свету”,
- адзначыў кс. Ламбардзі. - Таксама і жудаснае цунамі ў Індыйскім Акіяне, што адбылося
ў снежні 2004 г. і прынесла сотні тысяч ахвяр”. Святар падкрэсліў, што ў выніку японскага
землятруса і цунамі загінула каля 20 тыс. чалавек. “Ён застаў у расплох краіну, якая
жыве з такімі катастрофамі на працягу стагоддзяў, але да гэтай была не падрыхтавана.
Працяг катастрофы звязаны з аварыяй на атамнай электрастанцыі “Фукусіма”, наступствы
якой будуць адчувацца яшчэ на працягу доўгага часу. Давер да навуцы, меры бяспекі,
уся добра арганізаваная энэргетычная палітыка краіны былі пастаўлены пад пытанне.
Сёння ў Японіі функцыянуюць чатыры атамныя рэактары, у той час як 50 былі спынены”,
- расказаў іезуіт.
Кс. Ламбардзі адзначыў, што навукоўцы думаюць, што мінулагодняя
катастрофа стварыла нестабільную сітуацыю і цяпер магчымы іншы моцны землятрус. “Жыццё,
чаканні змяніліся. Мы ўсе глядзелі з захапленнем з якой адвагай, годнасцю і салідарнасцю
японскі народ адказаў на гэту трагедыю і арганізаваўся, каб перажыць яе наступствы”,
- сказаў святар. Ён таксама нагадаў, як у Вялікую Пятніцу, адказваючы на пытанне японскай
дзяўчынкі падчас тэлевізійнай праграмы Папа казаў: “Я таксама пытаюся чаму гэта адбылося.
Мы не маем адказу, але ведаем, што Езус, пакутаваў як вы, нявінна. Бог мяне любіць
і стаіць побач. Аднойчы я зразумею, што і гэтыя пакуты не былі надарэмнымі. Будзь
упэўнена, мы разам з табой, з усімі японскімі дзецьмі, якія церпяць. Молімся разам,
каб святло прыйшло да вас як мага хутчэй”.
“Перад абліччам трагедыі большай
за нас, не згубіць надзею і мець здольнасць знайсці глыбокі сэнс нашага лёсу, нашага
быцця на супольным зямным шляху”, - заклікаў кс. Ламбардзі ў сваёй штотыднёвай рубрыцы
на нашым радыё “Octava Dies”.