Papa, Pendestarisë Apostolike: ungjillëzimi i ri fillon edhe nga rrëfyestorja
Sakramenti i Rrëfimit është udhë për ungjillëzimin e ri: ky ishte thelbi i fjalës
së Papës, i cili, sot, në Sallën e Palit VI në Vatikan, u takua me pjesëmarrësit e
kursit mbi Pendesën e mbi Sakramentet, që lidhen me të, organizuar nga Pendestaria
Apostolike. 1.300 të pranishmëve, shoqëruar nga kardinali Manuel Monteiro de Castro,
Benedikti XVI u kërkoi t’u propozojnë me guxim Sakramentin e Pajtimit, atyre bashkësive
të krishtera, që duket sikur e kanë harruar. Përmes Rrëfimit,
mëkatari i penduar e braktis ‘njeriun e vjetër për t’u veshur me njeriun e ri’, duke
i dhënë mundësi Hirit Hyjnor të hyjë në zemrën e tij e ta bëjë të aftë për të shpallur
sërish Ungjillin. Kthimi i sinqertë i zemrave, shpjegoi Ati i Shenjtë, është motorri
i çdo reforme e forcë e vërtetë ungjillëzuese. Si gjatë Rrëfimit, ashtu edhe gjatë
shpalljes së Fjalës së Hyjit, meshtari duhet t’i çojë besimtarit Krishtin, përmes
të cilit Zoti na tregon mëshirën e vet: “Në një epokë emergjence edukative,
si e jona, në të cilën relativizmi hedh dyshime mbi vetë mundësinë e edukimit të konceptuar
si hapa drejt njohjes të së vërtetës, drejt kuptimit më të thellë të realitetit, e,
që këndej, drejt marrëdhënieve me atë të Vërtetë, që është Zoti; në një epokë të tillë,
pra, të krishterët janë të thirrur ta shpallin fuqishëm mundësinë e takimit të njeriut
të sotëm me Jezu Krishtin, në të cilin, Zoti u bë kaq i afërt, sa mund të shihet e
të dëgjohet”. Sakramenti i Pendesës, vazhdoi Papa, na ndihmon t’i kthejmë sytë
nga ky Zot e t’i kërkojmë të jetë pjesë e jetës sonë: “Siguria se Zoti është
afër e se, me mëshirën e vet, e pret njeriun, edhe mëkatarin, për ta shëruar nga ligështitë
me anën e Hirit të Sakramentit të Pajtimit, është gjithnjë dritë shprese për botën”. Ata,
që rrëfehen, kanë dëshirë të ndryshojnë. Prandaj, Papa u kujtoi meshtarëve se janë
protagonistë të fillimit të një jete të re për mëkatarët, që u besojnë shpirtin, duke
parë në ta Fytyrën e Krishtit. E u theksoi se risia nuk qëndron në braktisjen, apo
harrimin e së kaluarës, por në pranimin e Krishtit, i vetmi, që mund të hedhë dritë
edhe mbi skutat më të errta të ndërgjegjes: “Atëherë, ungjillëzimi i ri fillon
edhe nga rrëfyestorja! Fillon nga takimi i mistershëm i pyetjeve pa fund të njeriut
– shenjë e Misterit Krijues në të – me Mëshirën e Hyjit – e vetmja përgjigje e përshtatshme,
që mund ta shuajë etjen njerëzore për amshim”. Nëse kremtimi i Sakramentit
të Pajtimit do të bëhet kështu, shtoi Benedikti XVI, nëse përmes tij, besimtarët do
ta provojnë vërtet Mëshirën e Dashurinë, që na dhuroi Jezusi i Nazaretit, Zot e Krisht,
atëherë, ata vetë do të jenë dëshmitarë të besueshëm të asaj shenjtërie, që është
qëllimi i ungjillëzimit të ri. E kjo merr vlerë edhe më të madhe për meshtarët, të
cilët duhet ta përtërijnë gjithnjë takimin me Krishtin, përmes Pendesës e Rrëfimit.
“Kush t’ju takojë – u tha Papa meshtarëve të pranishëm – të mund t’i shpallë gjithë
botës se ka takuar Mesinë”.