Вечарам 7 сакавіка
ў Страсбургскім катэдральным касцёле адбылася св. Імша за Еўропу, у якой прынялі ўдзел
каталіцкія біскупы з краін паўднёва-усходняй Еўропы, а таксама шматлікія члены Савета
Еўропы, супрацоўнікі Еўрапейскага суда. Літургія стала кульмінацыйным момантам трохдзённага
форума арганізаванага Радай епіскапатаў Старога Кантынента, Саветам Еўропы і пастаяннай
місіяй Апостальскай Сталіцы пры гэтым інстытуце. Св. Імшу ўзначаліў арцыбіскуп Стасбургскі
Жан-Пьер Гралле, а гамілію прамовіў арцыбіскуп Альдо Джардано, пастанны назіральнік
Апостальскай Сталіцы пры Савеце Еўропы. Іерарх нагадаў, што на працягу гісторыі распаўсюджванне
хрысціянства заўсёды было звязана з цяжкасцямі і было паспяховым дзякуючы крыві мучанікаў.
Ён нагадаў, што таксама і сёння хрысціяне церпяць пераслед за сваю веру ў многіх кропках
планеты: у Іраку, Нігерыі, Пакістане і іншых краінах. “Сёння, як і ўчора, не проста
абвяшчаць свету Слова Божае, бо зло з’яўляецца вельмі моцным і перашкаджае дабру і
святлу”, - сказаў арцыбіскуп Джардано і дадаў, што чым больш існуе цемры, тым больш
хрысціяне павінны шукаць святла. Гэта, на яго думку, тычыцца як асабістага жыцця,
так і грамадскіх і міжнародных праблем.
Іерарх звярнуў увагу на рэвалюцыйнасць
Евангелля, якое навучае у першую чаргу служэнню іншым, а не клопату аб уласных выгадах
і кар’ерным росце. Ён адзначыў, што чалавек не заўсёды прымае сыноўскія адносіны,
якія прапануе Бог. “Сатана спакусіў Адама і Еву і сёння спакушае Еўропу да аўтаномнага
шляху, адлучэння ад Айца, пошуку самастойнага збаўлення”, - сказаў арцыбіскуп Джардано
і падкрэсліў, што “самота з’яўляецца сумнай, а свабода сама па сабе, не дае збаўлення.
Ён заклікаў даверыцца Богу, які можа задаволіць чаканні вечнасці, прыгажосці, праўды,
любові і жыцця”. Акрамя таго арцыбіскуп Джардано падкрэсліў, што гэта тычыцца і грамадскіх
адносін, якія не могуць складацца толькі з абавязкаў і правоў, а павінны быць напоўнены
бескарыснасцю, міласэрнасцю і адзінствам.