Апостальская Пэнітэнцыярыя арганізуе форум на тэму споведзі

5 сакавіка ў Рыме пачалася ХХІІІ сустрэча аб значэнні cакрамэнту споведзі, арганізатарам якой з’яўляецца Апостальская Пэнітэнцыярыя. У мерапрыемстве прымае ўдзел больш за 700 святароў з 84 краін свету. Яны паразважаюць аб значэнні гэтага сакрамэнта ў сучасным кантэксце, аб ролі святара і ўмацаванні яго ведаў. У інтэрв’ю нашаму радыё біскуп Джанфранко Джыроцці, рэгент Апостальскай Пэнітэнцыярыі, адзначыў, што адкрыццё нанова сакрамэнта споведзі шмат у чым залежыць ад святароў і іх свядомасці таго, што яны з’яўляюцца носьбітамі каштоўнага і незаменнага служэння. “Бл. Ян Павел ІІ казаў, што святары, удзяляючы вернікам ласку паяднання праз сакрамэнт пакаяння, здзяйсняюць найвышэйшы акт у сваім святарстве, пасля цэлебрацыі Эўхарыстыі”, - адзначыў арцыбіскуп Джыроцці.

“Наша сэстрэча мае на мэце ўмацаваць кампетэнцыі і веды спаведнікаў, каб падчас удзялення сакрамэнту споведзі, яны заўсёды кіраваліся навучаннем Касцёла”, - падкрэсліў іерарх. Ён адзначыў, што існуе шмат спосабаў вырашэння розных проблем, але ад таго хто спавядае патрабуецца ў першую чаргу дзейнічаць згодна з прынцыпамі касцёльнага навучання.

“Добры спаведнік павінен заўсёды быць адкрытым, спакойным, і перш за ўсё не паспешлівым; ён заўсёды павінен быць ветлівым і не забываць аб тым, што выконвае бацькоўскую ролю, бо адкрывае вернікам сэрца Айца: увасабляе вобраз Хрыста, Добрага Пастыра”, - сказаў біскуп Джыроцці.

Звяртаючыся да вернікаў, якія рыхтуюцца да споведзі, іерарх адзначыў, што важна адкрыць для сябе значэнне гэтага сакрамэнта, які з’яўляецца сакрамэнтам святасці, вельмі важным для жыцця хрысціян.