Putin sërish president i Rusisë, por opozita denoncon manipulime
Vladimir Putin u deklarua zyrtarisht fitimtar i zgjedhjeve presidenciale në Rusi,
me 63,75% të votave, në mes të protestave të opozitës e të manifestimeve të përkrahësve
të vet, që sot e ndanë Moskën më dysh. Pjesëmarrja në votimet e djeshme arriti në
65,3% të 110 milion zgjedhësve. Putin, i cili ka disa legjislatura, që kalon nga posti
i presidentit në atë të kryeministrit, e priti shpalljen e rezultateve me lot në sy,
pavarësisht se vëzhguesit e OSBE-së e të Këshillit të Evropës deklaruan hapur se vota
është “devijuar” qartas në favor të tij. Parregullsi procedurale në një të tretën
e qendrave të votimit, dhunime të ligjit për praninë e kandidatëve në televizion e
në gazeta, që penalizuan opozitën, janë karakteristikat e këtyre zgjedhjeve, sipas
vëzhguesve ndërkombëtarë.
E ndërsa Kremlini është në festë për mandatin e
tretë të Vladimir Putinit, edhe serbët e veriut të Mitrovicës, në Kosovë, organizuan
vargane me makina, buri e flamuj rusë e serbë, që mbrëmë mbushën rrugët deri në urën
mbi lumin Ibër. Manifestuesit e falenderuan Moskën për përkrahjen e vazhdueshme dhënë
Serbisë kundër pavarësisë së Kosovës. Kujtojmë se presidenti rus është qytetar nderi
i Zhubin Potokut dhe i Zveçanit.