Princi Kazimir, i mbiquajtur nga bashkatdhetarët ‘njeri i paqes’, lindi në Krakovi,
më 3 tetor 1458. Ishte i treti nga trembëdhjetë fëmijët e Kazimirit IV, nga dinastia
Jagelloni, me origjinë lituane, mbret i Polonisë dhe i Elizabetës të Austrisë, bijë
e perandorit Alberti II. Martesa e dy kokëve të kurorëzuara, që pati si shkues Gjonin
Dlugosh, historian e kanonik i Krakovisë, jo vetëm qe bashkim i lum dhe i frytshëm,
por edhe vërtet i shenjtë. Pikërisht Gjonit iu besua edukimi i Kazimirit, që në moshën
nëntë vjeçare. S’i kishte mbushur ende 15 vjetët, kur i ati e ftoi t’i printe
ushtrisë kundër mbretit hungarez, Matia Korvino. Po ai nuk pranoi ta çonte ekspeditën
deri në fund. Për ndëshkim, u mbyll tre muaj në kështjellën Dobski. Pavarësisht nga
kërkesat e të atit e të bujarëve, ai nuk pranoi kurrë më të rrokte armët. Nuk
deshi kurorë, as fron. I pëlqente më shumë të ndihmonte të varfërit, të shtypurit,
shtegtarët e të burgosutit. Deri një ditë, kur ua fali atyre të gjitha pasuritë, duke
fituar, kështu, lirinë e plotë. Nisi ta kalonte shumicën e kohës në Kishë, ku lutej
e merrte pjesë në kremtimet liturgjike, duke harruar shpesh edhe të hante. E edhe
natën zgjohej e shkonte të lutej në pragun e dyerve të mbyllura të kishave. Plot devoçmëri
për Zojën e Bekuar, i sjellshëm e i butë me të gjithë, qe kundërshtar i rreptë vetëm
i skizmatikëve. Askush nuk mundi ta bindte të merrte për grua të bijën e Shën Ferdinandit
III të Kastiljes, me të cilën e kishin fejuar. E si të martohej, kur e kishte mendjen
vetëm e vetëm tek Krishti e tek vdekja e afërme, që do ta çonte në banesën e Zotit
për amshim? Kazimiri vdiq nga turberkulozi, në Grodno, më 4 mars 1484, në moshën 26
vjeçare. Reliket e tij u varrosën në katedralen e Vilnius, ku vijojnë të nderohen
edhe sot. Më 1521 Papa Leoni X e shpalli Pajtor të Polonisë e të Lituanisë, ndërsa
Shenjt u shpall nën Klementin VIII, në vitin 1621, pasi, me ndërmjetësinë e tij, ndodhën
shumë mrekulli.Simbol i pastrisë, është ndërmjetës i fuqishëm kundër tundimeve të
mishit e të gjakut.