Арцыбіскуп Кентэрберыйскі: правы чалавека маюць патрэбу у рэлігіі
“Рэлігія спрыяе фундаментальным
прынцыпам універсальнасці і свабоды”, - сказаў кіраўнік Англіканскай Царквы архіепіскап
Кентэрберыйскі Роўэн Уільямс у часе візіту ў сядзібу Сусветнай Рады Цэркваў у Жэневе.
Выступаючы з прамовай на тэму правоў чалавека і рэлігійнай веры, архіепіскап адзначыў,
што сёння правы чалавека разглядаюцца выключна як збор законаў неабходны для задавальнення
індывідуальных прэтэнзій. На яго думку важным з’яўляецца ўсведамленне неабходнасці
альтэрнатыўнага падыходу, які ўлічвае культурныя і грамадскія стасункі. У гэтым дапамагае
менавіта рэлігійнае перакананне чалавека, лічыць архіепіскап Кентэрберыйскі. “Такое
бачанне павінна ўлічвацца для таго, каб зразумець правы не толькі ў кантэксце індывідуальных
патрэб, але з улікам ўзаемнай павагі паміж чалавечымі асобамі”, - сказаў ён. Іерарх
адзначыў, што менавіта рэлігія тлумачыць, чаму “правы чалавека з’яўляюцца універсальнымі”,
бо “прырода чалавека, створанага на вобраз і падабенства Бога, патрабуе, каб роўнасць
з абстрактнага ўяўлення стала правам, незалежна ад палітычных і сацыяльных сістэм”,
- падкрэсліў англіканскі іерарх.