Shqipëria përgatitet për presidencën e radhës të Këshillit të Evropës
"Shqipëria po përgatitet për marrjen e presidencës së radhës së Këshillit të Evropës
në maj, ndërsa Këshilli i Evropës e mirëpret këtë moment", u shpreh dje zv/kryeministri
dhe ministri i punëve të Jashtme të Shqipërisë, Edmond Haxhinasto, pas një takimi
me Gérard Stoudmann, Përfaqësues i Posaçëm i Sekretarit të Përgjithshëm të Këshillit
të Evropës, i ngarkuar me Zhvillimin Organizativ dhe Reformën e Këshillit të Evropës. Qëllimi
i takimit ishte shkëmbimi i mendimeve rreth prioriteteve të kryesisë shqiptare të
Komitetit të Ministrave të Këshillit të Evropës, si dhe rreth programeve të bashkëpunimit
me zyrën e Këshillit të Evropës në Tiranë. Ministri shqiptar Haxhinasto vlerësoi
se me marrjen e kësaj presidence, Shqipëria do të angazhohet plotësisht për të dhënë
një kontribut konkret në veprimtarinë e organizatës, në realizimin e objektivave dhe
të prioriteteve themelore të saj. Në vijim, ministri i Jashtëm i Shqipërisë vuri
theksin në rëndësinë që do t'i kushtojë presidenca shqiptare dimensionit rajonal të
integrimit me fokus të veçantë, pjesëmarrjen e Kosovës në takimet rajonale, në vijim
të marrëveshjes së fundit të arritur në Bruksel. Ministri Haxhinasto bëri me dije
se në qendër të takimit me zyrtarin e lartë të Këshillit të Evropës ishte situata
politike në vend dhe hapat që duhet të ndërmarrë vendi në plotësimin e rekomandimeve
të Evropës për kapjen e trenit të radhës për BE. Zoti Gérard Stoudmann nga ana
e tij u shpreh se Këshilli i Evropës mirëpret marrjen e presidencës së radhës nga
ana e Shqipërisë, duke e cilësuar si moment kyç për vendin. "Këshilli i Evropës
mirëpret presidencën e ardhshme të Shqipërisë. Kjo është e rëndësishme jo vetëm se
është hera e parë që merrni presidencën, por sepse kjo vjen në një moment kyç për
vendin. Prandaj nëse çdo gjë shkon mirë kjo do jetë një situatë me përfitim për të
gjitha palët", u shpreh Stoudmann. Zyrtari i lartë i KiE shprehu mbështetjen dhe
gatishmërinë e Këshillit të Evropës për të asistuar dhe kontribuar në integrimin e
Shqipërisë në Bashkimin Evropian.