Konferencë mbi 20 vjet emigracion shqiptar në Itali
“21 VJET EMIGRACION SHQIPTAR NË ITALI. Këtë vit, përkujtohet 21 vjetori i fillimit
të emigracionit nga Shqipëria, apo më mirë të themi, i eksodit të shqiptarëve, gjatë
viteve ’90, vitet e rënies së regjimit komunist. Të dhëna, përsiatje, njerëz,
politika dhe perspektiva të ardhshme”. Pra më 2 mars në Tiranë, mbahet një konferencë
mbi 20 vjetorin e emigracionit shqiptar në Itali, organizuar nga INAS, RAT, AGORÀ
e FAI CISL. Punimet e kësaj konference do të zhvillohen,në mjediset e Universitetit
Mesdhetar të Shqipërisë, Blv. Gjergj Fishta, nr. 52 në Tiranë, nga ora 9.00 – 17.00. Në
këtë takim do të analizohen aspekte të ndryshme të fenomenit të emigracionit shqiptar
në Itali, që filloi me rënien e diktaturës komuniste. Në këto 20 vite të emigrantë
shqiptarë kanë arritur të shërohen prej shumë dukurive negative që pësuan nga regjimi
komunist e të nisin nga fillimi një jetë të re. Kjo konferencë do të ndalet mbi
profilin e emigracionit shqiptar në Itali pas 20 vjetësh? Sa shqiptarë banojnë
e si janë të shpërndarë në territorin italian? Ku punojnë kryesisht? Cila është
gjendja civile e shqiptarëve që jetojnë në vendin fqinjë? Po ndarja sipas gjinisë?
Sa të mitur e pensionistë shqiptarë jetojnë përtej detit? Çfarë bëhet për
mbrojtjen e të drejtave të tyre? Cilat janë politikat që ndjek shteti italian në fushën
e imigracionit? Po qeveria shqiptare çfarë strategjie po ndjek në lëmin e emigracionit?
Çfarë imazhi kanë bashkatdhetarët tanë në Itali? Cilat janë perspektivat e ardhshme
të emigrantëve shqiptarë? Këtyre pyetjeve dhe shumë të tjerave, lidhur me një
nga dukuritë më të rëndësishme sociale, do t’u përgjigjen studiuesit, politikanët,
gazetarët, diplomatët, përfaqësuesit e organizatave të ndryshme, pra një sërë autoritetesh
të fushës, italiane e shqiptare, që janë ftuar të japin kontributin e tyre në konferencë. Konferenca
bëhet nën patronazhin e Ambasadës italiane në Tiranë dhe të Ministrisë së Punës, çështjeve
sociale dhe shanseve të barabarta. Po më hollësisht mbi këtë konferencë dhe
emigracion shqiptar në Itali të dëgjojmë sociologun e studiuesin shqiptar Rando Devole
në mikrofonin e Radio Vatikanit......