Арцыбіскуп Тамазі: Апостальская Сталіца катэгарычна асуджае насілле ў Сірыі
Арцыбіскуп Сільвано
Тамазі, пастаянны назіральнік Апостальскай Сталіцы пры ААН і іншых міжнародных арганізацыях
у Жэневе выступаючы перад удзельнікамі XIX сесіі па правах чалавека на тэму сітуацыі
ў Сірыі нагадаў заклік Папы аб неабходнасці тэрміновага спынення праліцця крыві і
салідарнасці з ахвярамі насілля. У інтэрв’ю нашаму радыё іерарх адзначыў, што міжнародная
супольнасць хоча скіраваць яснае пасланне да сірыйскіх уладаў, аб катэгарычным непрыняцці
сістэматычнага парушэння правоў чалавека, выкарыстання сілы супраць мірных дэманстрантаў,
забойства грамадзян, у тым ліку жанчын і дзяцей. Арцыбіскуп Тамазі адзначыў, што сітуацыя
ў Сірыі з’яўляецца вельмі дэлікатнай і важнай, бо ў адрозненні ад іншых краін рэгіёна
тычыцца раўнавагі на ўсім Блізкім Усходзе. Падчас выступлення ў Жэневе іерарх выказаўся
за неабходнасць спынення насілля, спрыянне дыялогу, прымірэнню і пошуку згоды. Было
закранута пытанне аб гуманітарнай дапамозе ахвярам канфлікту. Акрамя таго, арцыбіскуп
Тамазі нагадаў аб міры, які на працягу гісторыі панаваў у Сірыі сярод прадстаўнікоў
меншасцяў: сунітаў, шыітаў, алавітаў, хрысціян, курдаў. Гэта, на думку прадстаўніка
Апостальскай Сталіцы дапаможа знайсці выхад са складанай сітуацыі, якая ўзнікла сёння.
“Міжнародная
супольнасць знаходзіцца ў складанай сітуацыі ў якой немагчыма аказанне гуманітарнай
ці ваеннай дапамогі, як гэта было ў іншых краінах. Таму неабходна шукаць шлях да прымірэння
даючы зразумець, што наступствы канфлікта не будуць ігнаравацца ў будучыні. Міжнародная
супольнасць працягне, з дапамогай закона, пераслед тых, хто вінаваты ў пакутах людзей”,
- сказаў іерарх.
Арцыбіскуп Тамазі расказаў, што хрысціяне ў гэтай краіне заўсёды
жылі ў адноснай згодзе і міры з прадстаўнікамі іншых веравызнанняў. Аднак адзначыў,
што поўная дестабілізацыя абстаноўкі ў Сірыі можа прывесці да канфліктаў на рэлігійнай
глебе.