Më 29 shkurt kalendari kujton shën Osvaldin e Uorçesterit, ipeshkëv.
Bir i prindërve danezë, u bë murg benediktin në Fleuri të Francës, për t’u rikthyer
prift në Angli: në fillim kanonik, pastaj murg e, në fund, në krye të Kishës së Jorkut
e të Uorçesterit, ku e shndërroi kapitullin, në bashkësi murgare. Themeloi edhe dy
manastire në Vestburi-on-Trajm pranë Bristolit dhe në Ramsei. Kur u emërua kryeipeshkëv
i Jorkut, iu dha leja të kryesonte dhe dioqezën e Uorçesterit. Në sulmin kundër manastireve,
që shpërtheu pas vdekjes së Shën Eduardit martir, bashkësitë murgare u shpërndanë
përkohësisht. Po Shenjti nuk e humbi guximin murgar. Me mirësjelljen, që e dallonte,
me bujarinë e karakterin gazmor, vijoi të nderohej e të mbrohej nga vetë populli,
të cilin e mësoi dhe e drejtoi. Vdiq në Uorçester, më 28 shkurt të vitit 992, pasi
u kishte larë këmbët dymbëdhjetë të varfërve e ishte ulur në sofër, në shoqëri të
tyre. Trupi i tij u rivarros në një varr të ri nga Shën Vulfstani, edhe ai ipeshkëv
i Uorçesterit, prej vitit 1062 deri më 1095. Në Martiriologun Romak paraqitet si
“Mësues i ëmbël, gazmor, i pajisur me kulturë të thellë e të gjithanshme, që organizoi
shumë manastire sipas rregullës së Shën Benediktit. Emri i Ipeshkvit Shenjt, Osvald,
vjen nga saksonistja e do të thotë ‘Mbrojtës i shtëpisë”. Kremtohet më 28 shkurt,
ndërsa në vitet e brishta, si ky i sivjetmi, më 29. Kujtojmë se kur shkurti ka 29
ditë, viti quhet i brishtë, ose perishtup.