На працягу некалькіх
апошніх гадоў Касцёл стаў аб’ектам шматлікіх несправядлівых абвінавачванняў і правакацыйных
нападак. Сёння гэта асабліва тычыцца двух сфер, якія прывабліваюць увагу грамадскасці:
барацьбы з сексуальнымі злачынствамі і празрыстасці ў эканамічнай і фінансавай дзейнасці.
Сексуальныя зложыванні некаторых святароў, якія мелі месца, былі асуджаны Касцёлам
і зараз вядзецца актыўная дзейнасць па аднаўленні справядлівасці і дапамозе тым, хто
пацярпеў у іх выніку. Калі гаварыць аб фінансавых злачынствах, то Касцёл усё часцей
вымушаны адказваць на безгрунтоўныя і заведама правакацыйныя нападкі. Перад абліччам
абвінавачванняў у непразрыстаці фінансавай сістэмы, Апостальская Сталіца спрыяе больш
адкрытай дзейнасці ўсіх сваіх эканамічных інстытутаў. Сведчаннем гэтаму з’яўляецца
далучэнне Святога Пасаду да шэрагу міжнародных канвенцый, якія тычыцца барацьбы з
фінансавымі злоўжываннямі.
Напэўна, у сваім жыцці, кожны вернік таксама чуў
шматлікія абвінавачванні ў адрас Касцёла, якія тычыліся дзейнасці інквізіцыі, крыжовых
паходаў ці генацыда паўднёваамерыканскіх плямёнаў. Канешне, на працягу гісторыі такія
абвінавачванні гучалі шмат разоў. Але ці заўсёды яны адпавядалі рэчаіснасці і паказвалі
рэальнасць такой, якой яна была на самой справе? Гістарычныя факты паказваюць – што
не.
Некалькі гадоў таму, у выніку апытання праведзенага Еўрапейскім Парламентам
сярод студэнтаў універсітэтаў Старога Кантынента, стала вядомым, што каля 30% апытаных
былі ўпэўнены ў тым, што Галілео Галілей быў спалены жывым на кастры. Амаль усе (каля
97%) не сумняваліся ў тым, што яго жорстка катавалі. Некаторыя нават маглі ўзгадаць
аб так званай “гістарычнай праўдзе” – словах сярэдневечнага навукоўца, кінутых са
злосцю ў твар інквізітара: “Eppur si muove!” (“І ўсё ж яна верціца !”). Напэўна студэнты
былі б здзіўлены, калі б хто-небудзь расказаў ім аб тым, што падчас судовага працэсу
над Галілеем, які сапраўды меў месца ў 1633 г., ён жыў у шыкоўным палацы з відам на
Ватыканскія сады і ніводнага дня не пакутаваў фізічна. Пасля суда ён свабодна сустракаўся
з біскупамі, супрацоўнічаў з манахамі і нават выдаў кнігу. Галілео Галілей памёр у
сваім ложку ва ўзросце 78 гадоў, атрымаўшы прабачэнне і благаслаўленне Папы. Гэта
здарылася 8 студзеня 1642 г. Адна з яго дачок, якая была законніцай, запомніла яго
апошняе слова - “Езус!”.
Вядома, што легенда аб катаваннях і смерці Галілея
была створана антыкаталіцкай прапагандай. Мы маем справу з адной з шматлікіх гістарычных
выдумак, якія ствараліся з мэтай дыскрэдытацыі Касцёла і дэманстрацыі абмежаванасці
і несучаснасці тых, хто да яго належыць. Цікава, што большасць фальсіфікацый стваралася
на працягу XVIII-ХІХ ст. – эпохі так званай “Асветы” і адчайнага вызвалення ад “сярэдневечнага
цемрашальства”. Напрыклад словы “І ўсё ж яна верціца” уклаў у вусны Галілея таленавіты
журналіст Джузэппэ Барэцці, у сваёй кнізе “Італьянская бібліятэка”, якая была выдадзена
ў 1757 г. Лондане, амаль праз 100 гадоў пасля смерці італьянскага навукоўца.
Аб
тым, што на самой справе адбывалася з Галілео Галілеем і чаму ён апынуўся перад членамі
дамініканскага трыбунала, я думаю, мы пагаворым больш падрабязна ў адной з будучых
праграм. Але сёння, я хачу вам прадставіць новую рубрыку, якая будзе выходзіць кожны
аўторак на нашым радыё пад назвай “100 пытанняў – 100 адказаў”.
У наш час усё
часцей гаворка ідзе аб правінах католікаў перад светам. Эпоха сярэдневечча ўжо даўно
называецца “цёмнымі стагоддзямі”. Касцёл абвінавачваецца ў тым, што перашкаджае навуковым
даследванням, прагрэсу, абмяжоўвае правы чалавека і г.д. Гэта ўсё няпраўда. Кожны
з пунктаў абвінавачванняў, кожная з так званых “чорных легенд”, створаных вакол Касцёла,
патрабуе дасканалага аналізу дакументаў, ведання гісторыі і канешне гістарычнай рэальнасці,
у якой адбывалася тая ці іншая падзея. Менавіта развянчанне міфаў у сферы адносін
паміж Касцёлам і светам будзе галоўнай мэтай дадзенай рубрыкі. У гэтым нам дапамогуць
кнігі шматлікіх даследчыкаў і апалагетаў Касцёла, на якія мы будзем абапірацца ў нашых
штотыднёвых перадачах.
Вядома, што правакацыі, а таксама праўдзівыя і фальшывыя
абвінавачванні, уплываюць на ідэнтычнасць католікаў. Некаторыя, не паглыбляючыся ў
сутнасць пытанняў, нават пакідаюць Касцёл і губляюць сувязь з гэтай сапраўднай “сям’ёй”,
якая не мае абмежавання ў прасторы і часе. Таму я прапаную таксама закрануць пытанні,
адказы на якія неабходны для ўмацавання нашай сучаснай каталіцкай ідэнтычнасці: гэта
малавядомыя, але важныя гістарычныя факты, знаёмства з касцёльнымі інстытутамі і іх
дзейнасцю, постацямі святых ці звычайных католікаў, прыклад жыцця, якіх на мой погляд
будзе карысным і цікавым кожнаму верніку.