Të dielën e ardhshme Papa dhe Kuria Romake nisin Ushtrimet Shpirtërore
Të dielën e ardhshme, e para e Kreshmëve, 26 shkurt, pranë Kapelës ‘Nëna e Shëlbuesit’,
në Vatikan, do të fillojnë Ushtrimet Shpirtërore të Kuries Romake, në përgatitje të
Pashkëve. I pranishëm, edhe Benedikti XVI. Tema e zgjedhur për 2012-tën është “Bashkimi
i të krishterit me Zotin”, shkëputur nga Letra e parë e Shën Gjonit: “E bashkësia
jonë është me Atin e me Birin e tij Jezu Krishtin” (Gjn1,3). Meditimet do t’i
propozojë kardinali Laurent Monsengvo Pasinia, kryeipeshkëv i Kinshasës, në Republikën
Demokratike të Kongos, Ushtrimet shpirtërore do të nisin në orën 18.00 të së dielës
së ardhshme me Ekspozimin e Eukaristisë, pasuar nga kremtimi i Lutjeve mbrëmësore,
adhurimi dhe bekimi eukaristik. Ditët e ardhshme, paradite, do të kremtohen Uratët
e mëngjesit dhe ato të Orës së tretë, ndërsa pasdite, Lutjet mbrëmësore, adhurimi
dhe bekimi eukaristik.Meditimi përfundimtar do të mbahet të shtunën, më 3 mars, në
orën 9.00.