՜՜Հրանդ Տինք՝՝ Միջ-դպրոցական Շարադրութեան Մրցումը Բ. Տարին Ըլլալով Մեծ Յաջողութիւն
Արձանագրեց.
Անոր Մասնակցեցան Լիբանանահայ 13 Վարժարաններ։ Կազմակերպութեամբ՝
Պէյրութի Հայ Կաթողիկէ Մեսրոպեան Բարձրագոյն վարժարանի տեղեկատուական-ուսումնասիրական
աշակերտական խմբակին, շաբաթ, 18 փետրուարին, երկրորդ տարին ըլլալով, վարժարանի Ֆարաճեան
լսարանին մէջ տեղի ունեցաւ Միջ-դպրոցական ՜՜Հրանդ Տինք՝՝ շարադրութեան մրցանքը, մասնակցութեամբ
լիբանանահայ 13 վարժարաններու: Րաֆֆի Աբրահամեան ողջոյնի խօսքին մէջ ըսաւ որ ՜՜նախաձեռնութիւնը
նուիրուած է Տինքի յիշատակին, որ կը միտի հայկական վարժարաններուն միջեւ ստեղծել հայերէն
գրելու մրցակցութեան առողջ մթնոլորտ` քաջալեր հանդիսանալով ճշգրտօրէն հայերէնի գործածութեան՝՝
ապա յիշեց մրցանքի դատական կազմը՝ Շահան Գանտահարեան, Սարգիս Նաճարեան եւ Ժիրայր Դանիէլեան: Ապա
դատական կազմին անունով խօսք առաւ Սարգիս Նաճարեան, որ ներկայացուց մրցանքին օրէնքներն
ու կանոնները: Ան յայտնեց, որ առաջին երեք դիրքերը գրաւող աշակերտները պիտի ստանան նուէրներ,
մինչ առաջին հանդիսացող վարժարանը պիտի ստանայ ՜՜Հրանդ Տինքին նշանակը՝՝ որ մինչեւ
յաջորդ տարուան մրցանքը կը մնայ շահող վարժարանին մօտ: Նաճարեան աւելցուց, որ նշանակը
իբրեւ խորհրդանիշ կը պահուի եւ դպրոցէ-դպրոց շրջագայութեան մէջ մտնելով կը յաւերժացնէ
նահատակին յիշատակը: Սարգիս Նաճարեան գնահատեց մասնակից աշակերտներու տնօրէնները,
ուսուցիչները եւ ծնողները, որոնք քաջալեր հանդիսացան այս նախաձեռնութեան յաջողութեան:
Իր խօսքի աւարտին, Նաճարեան շեշտեց, թէ աշակերտները պէտք է սիրեն մայրենին, պահպանեն
հայութեան արժէքները եւ հետապնդեն հայութեան դատը, որպէսզի ապահովուի Տինքի սկսած երթին
շարունակութիւնը: Մրցանքի դատական կազմի խօսքէն ետք, ներկաները դիտեցին Մեսրոպեան
վարժարանի աշակերտական խմբակին պատրաստած Տինքի վկայութիւնները ներկայացնող տեսաերիզ
մը, որմէ ետք, մասնակիցները վարժարանի դասարաններուն մէջ գրեցին իրենց շարադրութիւնները:
Հրանդ Տինք շարադրութեան մրցանքի մրցանակաբաշխութիւնը տեղի պիտի ունենայ ուրբաթ, 16 մարտին
կայանալիք յատուկ հանդիսութեան ընթացքին: