Бэнэдыкт XVI да пробашчаў рымскіх парафій: святарская пакора дазваляе супрацьстаяць
дамінуючай культуры
23 лютага ў Залі Паўла
VI у Ватыкане адбылася традыцыйная вялікапосная сустрэча Святога Айца з пробашчамі
рымскіх парафій. Бэнэдыкт XVI звярнуўся да сабраных святароў з прамовай, у якой адзначыў,
што вялікай пакутай для Касцёла ў Заходняй Еўропе з’яўляецца недахоп пакліканняў.
“Але Пан кліча заўсёды. Трэба пачуць гэты заклік”, - адзначыў Папа. Пантыфік падкрэсліў,
што святары павінны быць сціплымі, лагоднымі і вялікадушнымі. Асаблівую ўвагу Папа
звярнуў на тое, што святарская пакора дае магчымасць знаходзіцца ў кантрасце з дамінуючай
культурай. “Гэта пакора дае магчымасць праўды. Таму ў Касцёле неабходна быць здольным
прымаць маленькія ролі, але вялікія ў вачах Бога”, - сказаў Бэнэдыкт XVI. Папа адзначыў,
што адной з вялікіх праблем сучаснага Касцёла з’яўляецца рэлігійная неадукаванасць.
“Мы павінны так паказаць змест веры, каб яна стала заклікам, а не толькі наборам догмаў.
Мы павінны зрабіць усё, каб аднавіцца і зрабіць Хрыста больш знаёмым людзям”, - сказаў
Святы Айцец. Пантыфік адзначыў важнасць вызвалення ад дыктатуры меркаванняў і захавання
веры ў Хрыста. “Толькі так мы зможам адказаць на выклікі часу”, - сказаў Папа.
Бэнэдыкт
XVI уручыў святарам брашуры пад назвай “Абраны Богам для людзей”, у якіх змешчаны
спецыяльныя духоўныя настаўленні, якія павінны дапамагчы больш плённа перажыць Год
веры.