Арцыбіскуп Клаўдыё
Марыя Чэллі, старшыня Папскай рады па сродках масавай камунікацыі, паведаміў, што
ў хуткім часе асноўныя прамовы Святога Айца будуць даступны ў фармаце кароткіх твітэр-паведамленняў.
У інтэрв’ю нашаму радыё іерарх адзначыў, што ўжо на працягу некалькіх гадоў дзейнічае
сайт www. pope2you.net, створаны гэтай дыкастэрыяй спецыяльна для моладзі. “Штодзённа
яго наведваюць тысячы маладых людзей з розных краін свету”, - падзяліўся арцыбіскуп
Чэллі. “Перад Божым Нараджэннем з дапамогай гэтага сайту мы давалі ім магчымасць для
разважанняў аб Святой Зямлі. У гэтым годзе, мы вырашылі з дапамогай “Твітэра” пазнаёміць
моладзь з пасланнем Святога Айца на Вялікі пост. З дапамогай супрацоўнікаў Папскай
рады "Cor Unum" мы выбралі з яго кароткія фрагменты твітэр-фармата, г.зн. не больш
за 140 знакаў, бо на наш погляд, ужываць сродкі, якімі шырока карыстаецца моладзь,
вельмі карысна для перадачы паслання Папы”, - сказаў арцыбіскуп Чэллі.
Іерарх
адзначыў, што адной з мэтаў дзейнасці дыкастэрыі, якую ён узначальвае, з’яўляецца
знаёмства людзей і асабліва моладзі з навучаннем Святога Айца. Таму ў хуткім часе
з дапамогай “Твітэра” можна будзе атрымліваць кароткія фрагменты з традыцыйнай нядзельнай
прамовы Папы перад малітвай “Анёл Панскі” і іншых важных пасланняў і зваротаў Бэнэдыкта
XVI. “Такім чынам, зараз мы можам сказаць, што хутка будзе адкрыты твітэр-канал Святога
Айца”, - сказаў арцыбіскуп Чэллі.