"З сэрцам у кантакце". Героі Беларускай Грэка-каталіцкай Царквы: ераманах Язэп (Германовіч)
У папярэдніх перадачах
я распавядаў пра беларускіх сьвятароў, што належалі марыянскаму манастыру ў Друі:
пра архім. Фабіяна (Абрантовіча) ды архім. Андрэя (Цікоту). Сёньня нашая перадача
прысьвечана асобе а. Язэпа (Германовіча), які быў іх братам па манастырскай супольнасьці,
супрацоўнікам ды сябрам.
Таксама як і два архімандрыты а. Германовіч быў сасланы
ў савецкі лагер, але яму пашчасьціла болей – Бог захаваў яго, каб распавесьці сьвету
пра подзьвіг мучаніцтва сваіх братоў, ды нявольна засьведчыць таксама і пра свой подзьвіг
– подзьвіг вернасьці Госпаду ды свайму сьвятарскаму пакліканьню.
Кароткая
біяграфія
Язэп Германовіч нарадзіўся 20 лютага 1890 г. у Гальшанах (на
Ашмяншчыне) у беларускай каталіцкай сялянскай сям'і. Там ён скончыў пачатковую, а
потым у Ашмянах – гарадзскую школу. У 1913 г. па заканчэньні Віленскай каталіцкай
духоўнай сэмінарыі ён быў рукапакладзены ў сьвятары.
У 1924 г. уступіў у ордэн
марыянаў, выкладаў у друйскай гімназіі і друкаваўся ў беларускіх выданьнях «Крыніца»
ды «Chryscijanskaja dumka». Прыняў усходні абрад і з 1932 да 1936, а потым з 1938
да 1948 працаваў ува Ўсходняй Каталіцкай Місіі ў Харбіне (Кітай).
У 1948 г.
ён быў разам з а. Цікотам і а. Падзявам арыштаваны кітайскімі ўладамі і перададзены
органам савецкага НКВД. Быў асуджаны і адбываў пакараньне ў сібірскіх лагерах. Пасля
вызваленьня ў 1955 г. захацеў вярнуцца ў Беларусь, але савецкія ўлады вымусілі яго
выехаць у Польшчу, адкуль у 1959 г. ён пераехаў у Рым, а потым у Лёндан.
У
Лёндане а. Язэп плённа займаўся рэлігійнай і культурнай дзейнасьцю, прымаў актыўны
ўдзел у жыцьці беларускага замежжа. Там жа напісаў успаміны «Кітай-Сібір-Масква».
У перыяд 1975-1977 быў рэдактарам часопсу «Божым шляхам». Памёр у Лёндане 26.12.1978
г. дзе і быў пахаваны.
«Вінцук Адважны»
«Вінцук Адважны» - менавіта
пад такім псеўданімам пісаў а. Язэп (Германовіч), якога сёньня мы з гонарам залічаем
да выдатных беларускіх хрысьціянскіх пісьменнікаў XX-га стагодзьдзя.
Нажаль
ня ўсе творы Вінцука Адважнага, якія выдаваліся на эміграцыі, вядомыя беларусам. Але,
дзякаваць Богу, у мінулым 2011 годзе, вышаў збор выбраных ягоных твораў ў серыі «Беларускі
кнігазбор». У зборніку прадстаўлены найбольш значныя творы, сярод іх ёсьць таксама
і ўспаміны лагернага жыцьця «Кітай-Сібір-Масква».
Гэтыя ўспаміны зьўляюцца
незвычайным сведчаньнем праўды пра тое, да чаго прыводзіў бязбожны камунізм у Савецкім
Саюзе. Айцец Язэп вельмі ясна разумеў тое, чаго яшчэ, нажаль, ня могуць да канца зразумець
нашыя сучаснікі... Маю на ўвазе тое, што камунізм ня быў і ня ёсьць лепшы за фашызм.
А тое, што мы гэтага не разумеем, дык пра гэта сьведчаць у нас, у Беларусі, помнікі
Леніну, вуліцы Савецкія ды Камуністычныя.
Вось як а. Германовіч гаворыць пра
пераслед людзей гэтымі двумя таталітарных сістэмамі, што зьявіліся на грунце бязбожнасьці,
атэізму:
«Як жыў Сталін, дазваляў сябе называць «бацькам усіх народаў» - тытул,
які належыць толькі Богу. І называлі яго «абаронцам міру і патронам згоды». А ён вынішчыў
дзесяткі мільёнаў нявінных людзей, а колькі мучыў у лагерах і турмах! Дык ягоны «мір»
- гэта было ашуканства, бо ня можа злы дух – анёл злосьці – быць анёлам міру і згоды!»
(«Слова аб пакуце»)
Ды ў іншым месцы:
«Гітлер і Сталін, як-бы згаварыўшыся,
ужывалі да беларусаў аднолькавую сыстэму перасьледу: бязбожнасьць фашыстых і камуністых
прыводзіла да перасьледу каталіцкай рэлігіі. Прагавітасьць зь іхнага боку на нашую
зямлю прыводзіла да перасьледу і «ліквідацыі» беларусаў.
Гітлер прынамсі не
хаваў, што пасьля памыснай вайны загорне ўсю Беларусь, выкіне жыхароў, а зямлю аддасьць
сваім. А бальшавікі, хоць гавораць іншае, робяць тое самае: беларусаў вывозяць, касуюць
раёны й вобласьці, у школах і ўрадах уводзяць расейшчыну, - адным словам, у самай
сярэдзіне Эўропы твораць «Вялікую Беларускую Пустыню», якую засяляюць маскалямі, бо
Гітлеру гэта не ўдалося!» («Кітай-Сібір-Масква»).
Айца Язэпа (Германовіча)
можна назваць «беларускім Салжэніцыным», аднак у яго успамінах ня знойдзем характэрнага
для Салжэніцына надрыву, безнадзеі... Наадварот, вера а. Язэпа асьвятляла нават самыя
змрочныя хвіліны ягоных пакутаў, а нават пакідала ў ім месца на пачуцьцё гумару, якое
нязменна таварышыла Адважнаму Вінцуку.
Тэкст успамінаў «Кітай-Сібір-Масква»
насычаны рознымі прымаўкамі ды выслоўямі. Вось некаторыя з іх: «Найгорш, калі баісься
– і ліха не мінеш, і надрыжысься!», «Прыйшлі важныя весьці, што няма чаго есьці»,
«Пачакаўшы, будзе Бог ласкаўшы»... Гэты кантраст гумару ды чалавечай драмы пад час
чытаньня часта выклікаў у мяне сьлёзы...
Хачу гэту перадачу скончыць вершам
нашага Вінцука Адважнага, які можна б было назваць яго жыцьцёвай праграмай, пакліканеньнем,
якому застаўся верным да канца:
«Зраблю сабе зычны цымбалы; Пайду на крыжовы
дарогі І сяду пад крыжам убогім, Зайграю для Божае хвалы...
Iграю, iграцi
я мушу. Тут ноты жыцьцём напiсаны, Дык будуць усе прачытаны, Як струны жывыя
парушу...»