Patriku siro-katolik Ignatius III Younan: të krishterët në Siri janë në rrezik, bota
të na ndihmojë
Ndër personalitetet e shquara të Kishës, që erdhën në Romë për koncistorin e fundjavës
së kaluar, ishte edhe Patriku i Kishës siro-katolike, Fortlumturia e Tij Ignatius
III Younan. I kërkuam të na përshkruajë gjendjen e bashkësive të krishtera në Siri,
ku regjimi i Bashar al Asadit vazhdon të mbjellë vdekje, sidomos në Homs, ku edhe
sot mbetën të vrarë mëse 15 vetë: Jo vetëm të krishterët, por sipas meje, e gjithë
popullsia siriane, është në ankth për të ardhmen, sepse në Siri kemi një gjendje tejet
të ndërlikuar: jo vetëm një fe e një etni, por fe, konfesione e etni të ndryshme.
Kësaj i shtohet fakti që pushtetin politik e ka vetëm një parti, “Baas”, e cila i
përket pakicës “alauite”, prandaj shumica myslimane sunite pretendon se është mënjanuar
padrejtësisht e dëshiron të rimarrë pushtetin. Kemi frikë se mos shpërthejë diçka
me karakter fetar, me pasoja shumë të rrezikshme. Gjendja është shumë e vështirë,
sidomos për ne të krishterët, që jetojmë atje prej mijëra vjetësh dhe e konsiderojmë
veten sirianë. Unë vetë flas si i krishterë sirian, sepse megjithëse e kam selinë
në Liban, jam lindur në Siri. Por të krishterët e ndjejnë veten në rrezik e kanë frikë
se një luftë civile me sfond fetar do t’i shkaktojë viktimat e para e më të shumta,
pikërisht në mesin e tyre. Kjo, sepse ata nuk kanë ndonjë parti të krishterë, së cilës
t’i referohen, nuk kanë armë e, përveç kësaj, janë përhapur gjithandej në Siri. Ka
zona ku shumica është e krishterë, por të krishterët janë kudo e në rastin e kaosit,
nuk ka qeveri qendrore në gjendje të kontrollojë situatën. Shpresojmë të mos arrihet
në këtë pikë. Në nivel ndërkombëtar, po bëhen përpjekje për t’i ulur palët rreth një
tryeze të rrumbullakët, që të gjejnë një zgjidhje të përshtatshme. Prandaj, ne lutemi
e lutemi, duke shpresuar që Siria ta kapërcejë këtë krizë, filluar para një viti tashmë. Çfarë
pret Kisha siro-katolike nga Këshillimi Apostolik post-sinodal për Lindjen e Mesme,
në dritën e ndryshimeve në rajon? Kisha siro-katolike, siç e dini, bën pjesë në
Kishat katolike të Lindjes së Mesme. Falë Zotit, të gjithë të krishterët ndjehen më
të bashkuar e punojnë për një unitet më të dukshëm. Kjo do të thotë se mund ta dëshmojnë
fenë së bashku, pa vështirësitë e së kaluarës. Njësoj si të tjerat, edhe Kisha jonë
shpreson që Ati i Shenjtë, falë kujdesit të tij atëror për gjithë Lindjen e Mesme
– të krishterë, myslimanë e besime të tjera – të na japë shpresën, në mënyrë që këto
qytetërime të lashta të Lindjes së Mesme të gjejnë rrugën e tyre drejt zhvillimit
më të madh, duke respektuar të drejtat e njeriut. Kjo do të thotë jo vetëm liri qytetare,
por sidomos liri fetare, me shumë rëndësi për ne. Ekziston rreziku i madh që rinia
të largohet për të kërkuar një jetë më të denjë për vetveten, për fëmijët e për familjen.
Prandaj, nëse ne, me ndihmën e bashkësisë ndërkombëtare, nuk i mbrojmë këto të drejta
themelore, do t’i vizitojmë këto toka vetëm për të parë rrënojat, siç ndodh në vende
të ndryshme të Tokës Shenjte, ku bashkësitë e krishtera nuk janë më.