З Мадрыда ў Рыа: 1-я Міжнародная сустрэча па Сусветных днях моладзі
З 28 сакавіка па 1
красавіка 2012 г. 250 дэлегатаў з усяго свету прымуць удзел у Міжнароднай сустрэчы
па Сусветных днях моладзі, арганізаванай Папскай радай па справах свецкіх у Рокка-дзі-Папа
недалёка ад Рыма. Як паведамляецца на інтэрнэт-старонцы ватыканскай дыкастэрыі, першы
дзень будзе прысвечаны сведчанням і разважанню над плёнамі дзён моладзі ў Мадрыдзе.
У другі дзень будуць абмяркоўвацца розныя аспекты душпастырскай падрыхтоўкі і матэрыяльна-тэхнічнага
забеспячэння Сусветных дзён моладзі ў Рыа дэ Жанейра. У пасяджэнні прымуць удзел таксама
арганізацыйныя камітэты з Мадрыду і Рыа. Тэмай трэцяга дня стане фармацыя маладых
людзей як прыярытэт місіі Касцёла.
Як паведамляюць арганізатары, праз сустрэчы
і абмен вопытам удзельнікі паспрабуюць вывучыць пытанне моладзевага служэння ва ўмовах
адукацыйных выклікаў сённяшняга дня. “З думкамі пра Сінод аб новай евангелізацыі і
Год веры, удзельнікі, натхнёныя вопытам веры, які атрымалі ў Мадрыдзе, адновяць свой
адказ на місійны заклік Пана – тэму дзён моладзі ў Рыа: “Ідзіце і навучайце ўсе народы”
(Мц 28, 19)”, гаворыцца ў паведамленні Папскай рады па справах свецкіх. У нядзелю
1 красавіка, у завяршэнне сустрэчы, удзельнікі накіруюцца на плошчу св. Пятра ў Рыме
на святкаванне Пальмовай нядзелі і XXVII Сусветнага дня моладзі. Літургію ў гэты дзень
узначаліць папа Бэнэдыкт XVI.