“На гэтым тыдні была
адна навіна, якая павінна глыбока абудзіць нашу здольнасць да спачування”, - адзначыў
кс. Фэдэрыко Ламбардзі, кіраўнік Залі Друку Апостальскай Сталіцы і дырэктар Ватыканскага
радыё, маючы на ўвазе пажар у турме горада Камаягуа ў Гандурасе, у якім загінулі сотні
людзей і каля 300 былі паранены. “Яны знайшлі смерць ад удушэння або полымя будучы
зачыненымі ў сваіх камерах. Жах. Катаванне. Згрызоты сумлення. Акрамя таго, большасць
з вязняў знаходзілася ў перапоўненых камерах, як гэта часта бывае ў самых бедных краінах
і не толькі. Такое адбываецца ўжо не ў першы раз”, - падкрэсліў езуіт. Кс. Ламбардзі
адзначыў, што падобныя трагедыі не рэдкасць і адбываліся на працягу апошніх гадоў.
“Таксама ў Гандурасе ў 2004 г. загінула каля 100 чалавек ў турме Сан Пэдро ді Сула.
Затым у Чылі, Алжыры, Дамініканскай Рэспубліцы, Бразіліі, Саўдаўскай Аравіі, Марока,
Сальвадоры, Тунісе, Аргентыне, Мексіцы. Калі ў турме адбываецца пажар, амаль заўсёды
гіне шмат людзей”, - нагадаў святар.
“Увага. Тое што людзі калісьці памыліліся,
не пазбаўляе іх годнасці і не апраўдвае тое, што яны змяшчаюцца ў атмасферы насілля,
якая спрыяе не толькі дэградацыі іх, але таксама і тых, хто павінен аб іх клапаціцца.
Такая атмасфера робіць амаль немагчымым іх вяртанне ў нармальнае грамадскае жыццё”,
- сказаў кс. Ламбардзі.
Дырэктар Ватыканскага радыё нагадаў, што ў дакуменце
Сінода Біскупаў Афрыкі, які Папа падпісаў у Беніне, звяртаецца ўвага на жудасную сітуацыю
вязняў на Чорным кантыненце. “Акрамя таго, візіты Святога Айца ў рымскія турмы, у
тым ліку той, які адбыўся два месяцы таму у турму Рэбібія, прыцягваюць увагу да цяжкіх
праблем вязняў ва ўсім свеце”, - адзначыў езуіт. “Іх сітуацыя з’яўляецца сведчаннем
узроўню цывілізаванасці краін. Нездарма Евангелле нагадвае нам, што адносіны да вязняў
будуць адным з крытэрыяў Божага суда над намі: “Быў у вязніцы і вы прыйшлі да мяне
– быў у вязніцы і вы НЕ прыйшлі да мяне”. Загінуўшыя у Камаягуа ўяўляюць для кожнага
нас аблічча Хрыста”, - адзначыў кс. Ламбардзі ў сваёй аўтарскай рубрыцы “Octava Dies”
на Ватыканскім радыё.