Nesër, në ditën e parë të Koncistorit, do të miratohen dekretet për kanonizimin e
shtatë Shenjtorëve të rinj
Në ditën e parë të punimeve të Koncistorit, siç është njoftuar, do të votohet edhe
për disa çështje kanonizimi. Kanë të bëjnë me tre burra, ndërmjet të cilëve, dy martirë,
dhe katër gra, dy laike. Janë: Tekakwita (ajo që i vë punët në rregull),
emri indian i Katerinës, e cila pas pak ditësh do të jetë Shenjtorja e parë lëkurëkuqe
e Amerikës. Jetoi e vdiq duke u lutur, në vitet e largëta 1600. I dyti, martiri
17 vjeçar filipinas, Pedro Kalunsgod, katekist i përgatitur nga jezuitët spanjollë,
u mbyt mizorisht, më 1593, prej njërit nga krerët irokezë të ishullit Guam të Paqësorit,
së bashku me jezuitin, atë Diego, në sa i pagëzonin të bijën. Kufomat e tyre u flakën
në oqean. Jetuan në vitet 1800, dy shenjtorët e tjerë. E para, Barbara Kope,
gjermane, fshatare e varfër, emigruar një herë në SHBA; pastaj rregulltare, në shërbim
të të gërbulurve në Honolulu. Vdiq ndërmjet të sëmurëve të saj më 1889, pas 30 vjet
shërbimi bujar. I dyti, Xhakomo Berthië, jezuit francez e misionar në Madagaskar,
u mbyt gjatë luftës II të vendasve kundër francezëve, në sa përpiqej të shpëtonte
të krishterët, që iknin nga tërbimi i kryengritësve e u flak në lumin Mananara. Bashkëkohës
i martirit jezuit, breshiani Gjovani Piamarta. Emri i tij lidhet me themelimin
e institutit “Zejtarët e vegjël”, kushtuar të rinjve, që vinin në Breshia për të kërkuar
punë; me krijimin e shoqatës së përshpirtshme të meshtarëve dhe të Kongregatës së
Shërbëtoreve të Varfëra të Familjes Shenjte të Nazaretit. Në vitet ‘800 jetoi edhe
Karmen Sallés Barangueras, terciare domenikane e, më pas, themeluese e Motrave
të Zojës së Papërlyer, kushtuar mësimdhënies. Sot Kongregata e saj është e pranishme
në të pesë kontinentet.E fundmja, Ana Shafer, shenjtore laike nga Bavaria,
bijë e një zdrukthëtari, vetë rrobalarëse, pas gjymtimit gjatë punës, u bë misionare
nga krevati, ku kalonte jetën, pa mundur të lëvizë. E sëmura nisi t’u japë guxim e
forcë për të jetuar, njerëzve të shëndoshë, që ngarendën ta vizitonin me shumicë.
Si humbi edhe zërin, pas një rrëzimi nga krevati, vdiq duke pëshpëritur me frymën
e fundit: “Jezus, unë jetoj në Ty”.