Benedikti XVI seminaristëve romakë: mos iu bindni pushtetit të financës e të mediave,
të cilat, megjithëse të domosdoshme, mund ta shtypin njeriun
I krishteri duhet të jetë i lirë e nuk duhet t’i bindet pushtetit të financës e të
mediave, të cilat, megjithëse janë të nevojshme, mund ta shtypin njeriun. Kështu foli
Papa Benedikti XVI, pasditen e djeshme, gjatë “Lectio Divina”, mbajtur për 190 meshtarët
e ardhshëm, përfaqësues të pesë seminareve romake, në selinë e Seminarit të Madh Papnor
Romak, me rastin e festës së Zojës së Besimit, Pajtore e tij. Ati i Shenjtë reflektoi
mbi Letrën e Shën Palit drejtuar Romakëve. Apostulli i Popujve i fton të krishterët
ta ofrojnë trupin e tyre si fli të pëlqyeshme për Zotin e të mos shkojnë sipas rregullave
të botës, por ta lejojnë Zotin t’ua shndërrojë zemrat. Kjo nuk do të thotë të jetosh
jashtë botës, nënvizoi Papa, është rrugë për të qenë i lirë. Ati i Shenjtë u përqendrua
në pushtetin aktual të financave e të mediave, të cilat megjithëse i duhen njeriut,
ka rrezik ta shtypin atë: “Bota e financave nuk përfaqëson më një mjet për favorizimin
e mirëqënies, për përmirësimin e jetës së njeriut, por kthehet në pushtet që shtyp,
që gati-gati duhet adhuruar, kthehet në “mamonë”, në hyjninë vërtet të rreme, që mbizotëron
në botë. Kundër këtij konformizmi, që çon në nënshtrimin para këtij pushteti, duhet
të jemi jo konformistë: nuk ka rëndësi të kesh, por të jesh! Të mos nënshtrohemi,
ta përdorim (financën) si mjet, por me lirinë e bijve të Zotit”. Njëlloj, edhe
informacioni nuk hedh vërtet dritë mbi ngjarjet e kësaj bote, duke u bërë më i rëndësishëm
se vetë realiteti. Madje, theksoi Benedikti XVI, bota virtuale, ajo e internetit dhe
e rrjetit, mund të bëhet më e rëndësishme se ajo reale. Por i krishteri nuk mund t’i
bindet udhës së shumicës, thjesht për faktin se është shumicë: “Antikonformizmi
i të krishterit na shpëton, na kthen tek e vërteta. T’i lutemi Zotit të na ndihmojë
të jemi njerëz të lirë në këtë antikonformizëm, që nuk është kundër botës, por është
dashuria e vërtetë brenda saj”. Sot, flitet shumë për Kishën e Romës, vërejti
Ati i Shenjtë, duke pasur parasysh sulmet e fundit mbi institucionet e saj dhe mbi
klerin katolik: “Edhe sot, flitet shumë për Kishën e Romës, për shumë gjëra,
shpresojmë të flitet edhe për fenë tonë, për fenë shembullore të Kishës së Romës dhe
e lusim Zotin pikërisht për këtë, që të flitet jo për kaq shumë gjëra, por për fenë
e Kishës”. Pastaj, paralajmërimi i Benediktit XVI: krishterimi nuk është spiritualizëm,
moralizim, por mishërim. Ftesa e Shën Palit për ta ofruar trupin për Hyjin është ftesë
për të qenë një me Zotin: “Realiteti i Zotit duhet të hyjë vërtet thellë brenda
nesh, që e gjithë jeta – e jo vetëm disa mendime – të jenë liturgji, të jenë adhurim”.