Parlamenti evropian nuk është dakord me mënyrën e administrimit të krizës greke
Një vend, si Greqia, që në lashtësi i ka dhënë Evropës filozofët e saj, parimet bazë
të demokracisë e të qeverisjes, mitet helenike, që edhe sot mësohen në shkollë, zvarritet
mes mundimesh drejt humnerës ekonomike, pa gjetur askënd ta shpëtojë vërtet. E famshmja
“Trojkë”, e përbërë nga Bashkimi Evropian, Fondi Monetar Ndërkombëtar dhe Banka Qendrore
Evropiane, i jep me pikatore ndihma djepit të qytetërimit evropian, duke i kërkuar
sakrifica të jashtëzakonshme popullit grek, jashtë çdo parimi solidariteti. Është
njësoj sikur nxënësi ta shohë profesorin e vet të vuajë e të mos i japë një pikë ujë,
pavarësisht se edhe “profesori” ka fajin e vet. Madje, edhe më keq… Vërtet, Gjermania
e Franca i kanë kërkuar Athinës të blejë nga arsenali i tyre ushtarak, në këmbim të
mbështetjes për dhënien e ndihmave. E sot, më në fund, ngre krye Parlamenti Evropian,
i cili kërkon të dijë nëse qëndrimi i “Trojkës” bazohet apo jo mbi parimet demokratike.
Të dëgjojmë presidentin e Lëvizjes Evropiane, Pier Virgilio Dàstoli: Trojka shkon
me mision në Athinë mbi bazën e një mandati, dhënë nga Komisioni Evropian, nga Eurogrupi,
pra nga institucionet që sot, kanë në dorë jo vetëm fatin e Greqisë, por në përgjithësi,
fatin e euros e të projektit evropian. Pavarësisht nga roli i Trojkës, problemi më
i përgjithshëm është: deri në ç’pikë puna e saj përkon me disiplinën demokratike?
Kujt i përgjigjen sot, ata që marrin vendime në Bruksel, në emër të 17 vendeve të
Eurozonës?