Egjipt: në Sharqi, Kisha e banesa të koptëve digjen nga 2 mijë fanatikë.
Rreth 2 mijë salafitë dogjën dje kishën e Shën Marisë e të Shën Abrahamit, shtëpinë
e famullitarit dhe disa ndërtesa të bashkësisë kopte, në fshatin Met Bashar, provincë
e Sharqisë, jo larg Kairos. Që nga 12 shkurti i kaluar, e gjithë zona është teatër
i ndeshjeve ndërmjet ekstremistëve islamikë dhe të krishterëve. Qetësia u rikthye
vetëm sot, falë ndërmjetësimit të disa liderëve të partisë Drejtësia dhe Liria e Vëllezërve
Myslimanë, që i bindën salafitët të largohen nga fshati. Shkak për shpërthimin e dhunës
ishte zhdukja e Rania Khalil, vajzë e krishterë, 14 vjeçe, e humbur që më 12 prillin
e kaluar, menjëherë pas kthimit të babait të saj në fenë islame. Vajza u gjet sot
e tani është në duart e policisë, që po e pyet së bashku me t’ëmën. Sipas salafitëve,
të krishterët e rrëmbyen vajzën, për ta penguar të kthehej në fenë islame. Po ngjarja,
si dhe dhuna, kanë shkaqe shumë më të thella. Zëdhënësi i Kishës Katolike, atë Rafik
Greike, nënvizon se pas fitores së zgjedhjeve nga partitë islamike, sulmet kundër
koptëve po bëhen gjithnjë më të shpeshta, në të gjithë vendin. Rasti më i freskët,
por jo i fundmi, është ai i Kobri-al-Sharbat, pak kilometra larg Aleksandrisë. Salafitët
u përpoqën të dëbonin 62 familje të krishtera, mbarë bashkësinë kopte të katundit,
duke u kallur flakën banesave. Kjo ndodhi pas denoncimit nga ana e disa myslimanëve
kundër Murad Sami Guirgis, rrobaqepës i krishterë, i akuzuar se kishte në celular
fotografi të paligjshnme të një gruaje myslimane. Fanatikët islamikë, nënvizon atë
Greike, i përdorin si pretekst rastet e kthimit nga islami, në krishtërim, e anasjelltas,
për ta frikësuar, për ta sulmuar e për ta bërë të ikë bashkësinë kopte, duke braktisur
vendin. E kjo ndodh në mbarë Egjiptin. Në mediat përendimore, shpjegon, shpesh herë
krijohet ideja se ndeshjet me natyrë fetare ndërmjet të krishterëve e myslimanëve
trondisin vetëm Egjiptin e Epërm dhe lagjet e varfëra të Kairos, ku popullsia është
injorante. Po kjo nuk është e vërtetë. Dhuna po i gjakos të krishterët edhe në Jug
të vendit. Kur flitet për kthim në njërën nga të dyja fetë, nuk ka dallime ndërmjet
të pasurve e të varfërve, ndërmjet njerëzve të dijshëm e të padijshëm, ndërmjet Egjiptit
të Epërm e atij të Poshtëm. Kush kthehet në krishterim, denoncon atë Greike, dëbohet.
Ndërsa kush denoncon kthimet me forcë në islam, nuk mbrohet fare nga autoritetet e,
në shumicën e rasteve, detyrohet t’i tërheqë akuzat, përmes presioneve e kërcënimeve.
Sipas meshtarit, një situatë e tillë mund të bëhet edhe më e rrezikshme në të ardhmen.
Salafitët janë partia e dytë në Egjipt. Falë rezultatit elektoral, ata kontrollojnë
20% të parlamentit e, muajt e ardhshëm, mund t’i përligjin qëndrimet e tyre kundër
të krishterëve edhe politikisht.