Zëdhënësi i ipeshkvijve të Greqisë flet për “një popull pa shpresë”
“Gjendja është shumë e vështirë. E ardhmja duket krejt e pasigurtë, ashtu si edhe
qëndrimi ynë në Eurozonë. Populli vuan veçanërisht për këtë pasiguri, që karakterizon
jetën e përditshme, sidomos në shtresat më të brishta të popullsisë”. Pas valës së
dhunës, të dielën e kaluar, në sheshin Sintagma, në qendër të kryeqytetit grek, pas
miratimit të masave të rënda kundër krizës në parlament, flet zëdhënësi i Konferencës
Ipeshkvnore Katolike të Greqisë, Nikolas Gasparakis. Në një intervistë për agjensinë
kishtare të lajmeve Sir, ai përshkruan “një popullsi, që po e humb gjithnjë e më shumë
shpresën, të stërmunduar nga shkurtimet, pushimet nga puna e taksat. Por gjendja –
thekson Gasparakis – nuk mund të ndryshohet me dhunën e shkaktuar nga disa qindra
anarkistë. Personalisht nuk besoj se do të ndryshojë gjë, situata është vërtet e vështirë.
Gjermania dhe Bashkimi Evropian tregohen shumë të rreptë, por harrojnë se Greqia paguan
edhe për krizën ndërkombëtare, që ka përfshirë vendet evropiane. Është dështimi i
kapitalizmit, është triumfi kobzi i ekonomisë pa shpirt e pa etikë. Papa e shpreh
mirë këtë në enciklikën “Caritas in Veritate”. Kurrë më shumë se tani – vazhdon zëdhënësi
i ipeshkvijve katolikë – Kishat e krishtera, ortodokse e katolike, janë pranë popullit,
shpirtërisht e materialisht. Solidariteti vijon për të gjithë, por kemi nevojë për
ndihmë. Ka ardhur koha t’i bashkojmë zërat për t’i thënë një fjalë shprese popullit
të lodhur e të shqetësuar”. Një thirrje e ngjashme qe ajo e kreut të ipeshkvijve
grekë, imzot Françesko Papamanolis, i cili, para disa ditësh, foli për “gjendje tragjike”
dhe kërkoi ndihmën e Selisë së Shenjtë e të ipeshkvijve evropianë. Ndërkaq, në një
letër për kryeministrin Lukas Papademos, edhe kryeipeshkvi ortodoks i Athinës dhe
i të gjithë Greqisë flet për përmasat e tmerrshme, që kanë marrë varfëria dhe papunësia
në vend.