Папа заклікаў улады Сірыі да тэрміновай рэакцыі на законныя памкненні народу
Святы Айцец падчас
малітвы “Анёл Панскі” 12 лютага адзначыў, што з вялікай трывогай сочыць за драматычнымі
і растучымі выпадкамі насілля ў Сірыі. У апошнія дні яны прывялі да шматлікіх ахвяр.
Бэнэдыкт XVI падкрэсліў, што памятае “у сваёй малітве ахвяр, сярод якіх ёсць некалькі
дзяцей, параненых і тых, хто пакутуе ад канфлікту, наступствы якога выклікаюць усё
большую заклапочанасць”. Папа настойліва заклікаў пакласці канец насіллю і кровапраліццю.
“Я запрашаю ўсіх – і перш за ўсё палітычную ўладу Сірыі – уступіць на шлях дыялогу,
паяднання і міру”, - сказаў Святы Айцец. Ён заклікаў сірыйскае кіраўніцтва да тэрміновай
рэакцыі на законныя памкненні розных груп народу і пажаданні міжнароднай супольнасці,
зацікаўленай агульным дабром грамадства і рэгіёну.