Папа здзейсніў шэраг персанальных і тэрытарыяльных змен у Касцёле

Бэнэдыкт XVI здзейсніў 11 лютага шэраг персанальных і тэрытарыяльных змен у Касцёле. У Буркіна Фасо Папа стварыў новую дыяцэзію Тэнкодого з часткі дыяцэзіі Фада-н’Гурма. Першым біскупам новай тэрытарыяльнай структуры Касцёла стаў а. Проспер Концьембо, які да гэтага часу з’яўляўся віцэправінцыялам Айцоў Каміліянаў у краіне. Новая дыяцэзія займае плошчу ў амаль 11 тыс. кв. км. З амаль 1 млн. жыхароў 138 тыс. тут з’яўляюцца католікамі. На дадзены момант на тэрыторыі новай дыяцэзіі існуе ўсяго 9 парафій, у якіх працуе 50 святароў.

Святы Айцец стварыў таксама новую Апостальскую прэфектуру Робэ ў Эфіопіі. Яна была ўтворана з часткі Апостальскага вікарыята Мэкі, а яе першым пастырам Пантыфік прызначыў капуцына, а. Анджэло Антоліні, які да гэтага часу з’яўляўся Біскупскім вікарыем для рэгіёну Робэ і дырэктарам Нацыянальнай місійнай арганізацыі. Новая прэфектура займае плошчу ў 116 тыс. кв. км, на якой пражывае амаль 3 млн. чалавек; 2 тыс. з іх належыць да Каталіцкага Касцёла. Тут існуе 4 парафіі, у якіх працуе 5 святароў.

Пантыфік здзейсніў таксама некалькі прызначэнняў у Касцёле ў Літве. Святы Айцец прыняў адстаўку пастыра дыяцэзіі Кайшадорыс біскупа Ёзаса Матулайціса і прызначыў біскупа Ёнаса Іванаўскаса, былога дапаможнага біскупа Каўнаскай архідыяцэзіі, яго наступнікам. Змены адбыліся таксама ў літоўскай дыяцэзіі Цяльшай, куды Святы Айцец прызначыў дапаможнага біскупа. Ім стаў францішканін, а. Лінас Вадап’янавас. Да гэтага часу ён з’яўляўся віцэправінцыялам літоўскай правінцыі “Святога Казіміра” Айцоў Капуцынаў.