“Dëshirojmë t’i dhurojmë Papës atmosferën e hirit të një Kishe, që vjen në ditët tona
nga e kaluara, nga bashkësitë e para të krishtera”- këtë theksoi kryeipeshkvi, imzot
Rikardo Fontana duke u takuar me gazetarët. Nënvizoi, pastaj, se vizita e Benediktit
XVI, në program për 13 majin e ardhshëm, nuk duhet të bazohet mbi retorikë, por mbi
elemente konkrete. Nga këndvështrimi organizativ, shtoi Prelati, Mesha do të kremtohet
në Prato, park përbri Katedrales së Arecos, ku do të ketë vende për t’u ulur dhjetë
mijë besimtarë. Të tjerët, duhet të kënaqen duke e ndjekur Meshën në këmbë, nga ekranet
e mëdha, që do të vendosen në të katër anët e parkut, ndërsa elteri do të ketë në
sfond kodrën e Kazentinos. Mesha do të kremtohet në orën 10.00, pastaj Papa do
të vizitojë qendrën historike sepse, siç është shprehur vetë Ati i Shenjtë, dëshiron
të hyjë në zemrën e aretinëve. Së fundi, përsa i përket Sansepolkros, qytet që
kremton njëmijë vjetorin e themelimit, Benedikti XVI do të takohet me banorët në sheshin
Torre di Berta, ku, nga një tribunë e ngritur enkas, menjëherë pas fjalimit të përshndetjes
nga ana e kryetarit të bashkisë, Papa do t’u drejtojë fjalën besimtarëve” – tha në
përfundim të takimit me gazetarët, imzot Fontana.