Çelësi i fjalëve të Kishës: ç'është "Satana" dhe si mundet ai
Takohemi shpesh me të keqen, shkandullin, që tregon mjerimin njerëzor, nganjëherë
edhe brenda vetë Kishës. Në përgjithësi, besimtarët e ndjejnë më të pranishëm Zotin,
siç është e natyrshme, por kanë ide të vagëllta për “Djallin” dhe fuqinë e
tij, i cili bën ç’është e mundur të krijojë shkandull në gjirin e popullit të Zotit,
për ta larguar atë nga feja e nga Kisha. Në popullin shqiptar, ai thirret shpesh me
fjalë si “Qoftëlargu”, “I mallkuari”, “Brinoçi”, e me njëmijë mënyra të tjera, për
të mos ia përmendur emrin. Pikërisht për të do të flasim në emisionin e sotëm, duke
tërhequr vëmendjen ndaj faktit, që Dreqi vazhdon të veprojë në historinë e njerëzve
e është gjithnjë aktiv, siç ka theksuar disa herë Papa Benedikti XVI. Fjala “Satana”
ka origjinë hebraike dhe përmendet 36 herë në Besëlidhjen e Re. Është e barazvlershme
me fjalën greke “diàbolos”, që përmendet 37 herë. Pra, kemi të bëjmë me një prani
të rëndësishme, që nuk mund të eliminohet si ndonjë bestytni popullore. Me gjuhën
biblike, disa herë flitet për “shpirtra të këqinj”, duke nënkuptuar “të papastër”,
për të treguar të kundërtën e së mirës, të së shenjtes, të pozitives, të zonës së
tempullit e të Zotit. “Satana” do të thotë “kundërshtar, akuzator” e përdoret
për të treguar një lloj gjykatësi, i cili, në Librin e Jobit, merr pjesë në gjykatën
qiellore dhe ka për detyrë denoncimin e mëkateve të njerëzve (2,1-7). Ndërsa “djall”,
nga greqishtja, do të thotë “ai që ndan” e ky term është vetëm negativ: Dreqi është
tunduesi, që përpiqet ta largojë Zotin nga njeriu. Ky aspekt mbizotëron në Besëlidhjen
e Vjetër, e cila e konsideron Djallin si prani të errët në histori, që mundohet ta
rëndojë peshoren e lirisë së njeriut nga e keqja, në kundërshtim me Hirin hyjnor,
që e orienton dhe e mbështet njeriun në rrugën e së mirës. Krishti flet me Djallin
drejtpërdrejt, duke iu drejtuar një interlokutori personal, i cili, për shembull,
hyn në trupin e njeriut, që dëgjon Fjalën e Zotit në sinagogë, siç e përshkruan Shën
Marku Ungjilltar (1,21-28). Jezusi lufton me Djallin e Mallkuar e me të keqen. “Kundërshtari”
i Tij bën ç’është e mundur të fitojë, duke korruptuar njerëzit, madje edhe dishepujt
e Jezu Krishtit. I mirënjohur është rasti, kur Krishti reagon kundër shën Pjetrit
dhe e quan “satana”, sepse “nuk i kishte në mend punët e Hyjit, por punët e njerëzve!”
dhe donte t’i largohej Udhës së Kryqit(Mt 16,21-23). Dreqi – që Libri i Urtisë(2,24)
e identifikon me gjarpërin tundues të Zanafillës, duke thënë “prej smirës së Djallit,
vdekja hyri në botë” – duket sikur triumfon me vdekjen e Krishtit. Në të vërtetë,
Ringjallja e Jezusit, Pashkët, janë shenjë e kthesës së madhe, e ngadhnjimit mbi Djallin.
Megjithëse Qoftëlargu e vazhdon veprën e tij përçarëse dhe shkatërruese në botë e
ka njerëz, që e ndjekin, në fund të fundit, fati i tij është ai, që Libri i Zbulesës
e përshkruan me një simbol të fuqishëm, duke e parë të bjerë përgjithmonë, madje “të
plandoset në liqenin e zjarrtë dhe të sulfurtë”(20,10). Edhe Jezusi, duke u dhënë
pushtet dishepujve të veprojnë, e shihte Djallin “kah binte porsi rrufeja prej qiellit”(Lk
10,18). Në Shkrimet e Shenjta pra, gjendet siguria e çdo besimtari se “Hyji,
autori i paqes, do ta dërrmojë për së shpejti djallin nën këmbët tuaja”(Rm 16,20).
Fjala e fundit në historinë e njerëzimit e të Gjithësisë, nuk i takon Djallit, pasi
“dyert e ferrit nuk do të ngadhnjejnë”, por Zotit, siç paqyrohet plot dritë
e shkëlqim në skenën përfundimtare të Librit të Zbulesës(kapp. 21-22).